Қазақстанда азаматтарға арналған тағы бір цифрлық қызмет іске қосылды. Енді электронды жеке медициналық кітапшаны eGov Mobile және Halyk мобильді қосымшаларынан көруге болады, деп жазады Qazaqstan Media.
Бұл қызмет әсіресе декреттелген мамандық иелері үшін ыңғайлы. Олар енді қағаз медициналық кітапшаны өзімен бірге алып жүрмейді. Қажет болған жағдайда құжатты телефоннан көрсету жеткілікті.
Жаңа жүйе санитариялық-эпидемиологиялық қызметтің жұмысын да жеңілдетеді. Мамандар қызметкерлердің міндетті медициналық тексеруден уақытылы өткенін қашықтан бақылай алады. Егер медициналық тексеруден өту мерзімі өтіп кетсе, санитариялық қызмет қызметкерді уақытша жұмыстан шеттету бойынша жедел шара қабылдай алады.
Сонымен қатар Қазақстанда санитариялық-эпидемиологиялық қызметтің бірыңғай цифрлық экожүйесі құрылды. Ол бірнеше бағытты біріктіреді:
- мемлекеттік санитариялық-эпидемиологиялық бақылау;
- декреттелген мамандық иелерінің медициналық тексерулері;
- зертханалық зерттеулер;
- кәсіпорындардың өндірістік бақылауы;
- халықтың вакцинациясын бақылау.
Мамандардың айтуынша, жаңа цифрлық жүйе медициналық құжаттардың қолжетімділігін арттырып, санитариялық бақылаудың тиімділігін күшейтуге мүмкіндік береді.
Тағы оқыңыз: Петропавлдық ер адам баласына алимент төлемегені үшін сотталды
