Алда өтетін Құрылтай депутаттарының сайлауы елдегі алдағы өзгерістердің маңызды кезеңіне айналуы мүмкін. Петропавл қалалық ардагерлер кеңесі төрағасының орынбасары Иманғали Тәтваев бұл үдерісте жастардың рөлі ерекше екенін айтты. Оның пікірінше, мемлекеттің болашағы тек биліктің шешімдеріне ғана емес, азаматтардың өз белсенділігіне де байланысты, деп хабарлайды Qazaqstan Media.
Иманғали Сұлтанұлы «Құрылтай» ұғымының тарихи тамыры тереңде жатқанын еске салды. Бұрын мұндай жиындарда халық пен мемлекеттің өміріне қатысты аса маңызды мәселелер шешілген. Оның айтуынша, қазіргі Құрылтай да ел үшін маңызды шешімдер қабылданатын алаңға айналуы тиіс.
««Құрылтай»» сөзі бізге ата-бабамыздан жеткен. Ертеректе онда көптеген маңызды мәселелер шешілетін. Енді Жаңа Қазақстандағы Құрылтайдың алдында да үлкен міндеттер тұр. Біз одан қоғамдағы жаңа өзгерістерді күтеміз», – деді Иманғали Тәтваев.
Ардагерлер қауымдастығының өкілі жастардың сайлауға қатысуына ерекше назар аударды. Оның пікірінше, өзгерістердің қаншалықты жылдам әрі жүйелі жүзеге асатыны азаматтардың белсенділігіне тікелей байланысты.
«Біз, ардагерлер, көп нәрсені көрдік және алдағы өзгерістерді зор үмітпен күтіп отырмыз. Әсіресе жастардың сайлауға белсенді қатысуы өте маңызды. Егер өзіміз белсенділік танытпасақ, ешкім бізге жаңа өмірді әкеліп бермейді», – деп атап өтті ол.
Оның айтуынша, Жаңа Қазақстан идеялары тек саяси бағдарламаларда ғана емес, болашақ депутаттардың жұмысында да көрініс табуы тиіс. Ардагерлер Құрылтайдың жаңа құрамынан қоғам мен елдің дамуына бағытталған нақты шешімдер күтеді. 2026 жылғы 23 тамызда Қазақстанда алғаш рет Құрылтай депутаттарының сайлауы өтеді. Бұл дауыс беру елдің өкілді органын қалыптастырудағы жаңа кезең болмақ.
Тағы оқыңыз: Бірі таңғы жүгіруге шықса, енді бірі қоғамдық тыңдау өткізіп, ауыл-аймақты аралап жүр.
