Биыл Петропавлда аулаларды ауқымды түрде жаңарту жұмыстары басталады. Билік бірден 83 аула аумағын ретке келтіруді жоспарлап отыр. Қазіргі уақытта тұрғындар өздері сенбіліктерге шығып, тазалық жұмыстарын жүргізіп, алдағы өзгерістерге дайындалуда, деп хабарлайды Qazaqstan Media.
Петропавлдағы Жамбыл мен Горький көшелерінің қиылысындағы аулада сенбілікке егде жастағы тұрғындар шықты. Олар қолдарына сыпыртқы алып, көтеріңкі көңіл-күймен жұмыс істеді. Оларға облыс әкімі Ғауез Нұрмұхамбетов пен қала әкімі Серік Мұхамедиев қосылды. Қонақтарды тұрғындар жылы қарсы алып, қаланың біртіндеп көркейіп келе жатқаны үшін алғыстарын білдірді. Жақын арада олардың ауласы да абаттандыру жұмыстарымен қамтылады.
Қазір бұл жерде тек дайындық жұмыстары жүргізілуде. Негізгі жұмыстар күн жылынғанда басталады. Жоспарда қоқыс жәшіктеріне арналған қоршаулар орнату, гүлзарлар жасау, шағын сәулет нысандарын қою, футбол алаңын салу, жарықтандыру жүргізу және бейнекамералар орнату бар.
Тұрғындардың айтуынша, аула жобасы «Strong Service» ЖШС мердігерімен бірге талқыланған. Барлық шешімдер алдын ала келісілген. Биыл қалада барлығы 83 аула жаңартылмақ.
«Бұл өте үлкен көрсеткіш. Әдетте біз 45–50 аула ғана жасайтын едік», — деді Ғауез Нұрмұхамбетов.
Тағы оқыңыз: Петропавлда Конституция көшесінің бойындағы үйлердің қасбеттері жылу панельдерімен қапталады
