«Заң мен тәртіп» қағидатын іске асыра отырып, Шал ақын, Ғ.Мүсірепов, Айыртау аудандарының прокуратуралары «Ауылдағы заң мен тәртіп – қауіпсіздік және жауапкершілік, еңбек және даму кепілі» акциясын өткізді. Ол жұмысшылардың құқықтық сауаттылығын арттыруға, сондай-ақ ауыл шаруашылығы құрылымдарындағы жазатайым оқиғалардың алдын алуға бағытталған, деп жазады Qazaqstan Media.
Акция аудандық прокуратура органдары басшыларының қатысуымен, аудан әкімдіктерінің, Мемлекеттік еңбек инспекциясы комитетінің СҚО бойынша департаментінің және құқық қорғау органдарының өкілдерімен бірлесіп ұйымдастырылды.
Акцияның негізгі мақсаты ауыл шаруашылығы кәсіпорындарында заңға бағынатын мінез-құлықты қалыптастыру, ауыл шаруашылығы жұмыстарын жүргізу кезінде құқық бұзушылықтардың, жазатайым оқиғалар мен апаттардың алдын алу, сондай-ақ құқықтық және өндірістік тәртіп деңгейін арттыру болды.
Іс-шаралар Солтүстік Қазақстан облысының Шал ақын, Ғ.Мүсірепов және Айыртау аудандарындағы бірнеше алаңда өтті. Басшылар мен қызметкерлердің жалпы саны 200-ден астам адамды құрады.
Кездесулер барысында жұмысшылар мен жұмыс берушілерге еңбек заңнамасының талаптары, еңбекті қорғау және қауіпсіздік техникасы нормалары, сондай-ақ оларды бұзғаны үшін жауапкершілік түсіндірілді. Жалақыны уақтылы төлеу, еңбек қатынастарын ресми түрде ресімдеу және қауіпсіз еңбек жағдайларын қамтамасыз ету мәселелеріне ерекше назар аударылады.
Акция жұмыскерлер мен жұмыс берушілердің құқықтық сауаттылығын арттыруға, өндірістік тәртіпті нығайтуға және еңбек қатынастары мен еңбекті қорғау саласындағы бұзушылықтардың алдын алу бойынша қосымша шараларды әзірлеуге ықпал етті.
Тағы оқыңыз: Білім бюджеті қайтадан аудандарға өтеді
