Есіл ауданы Бірлік ауылында ауыз су жүйесінің құрылысы қарқынды жүріп жатыр. Бұл жоба техникалық жағынан ғана емес, әлеуметтік маңызы жағынан да ерекше. Жаңа су құбыры ауыл тұрғындарын таза ауыз сумен қамтамасыз етіп қана қоймай, ауылдың әрі қарай дамуына жол ашады, деп хабарлайды Qazaqstan Media.
Есіл ауданына қарасты Бірлік ауылы – өңірдегі маңызды инфрақұрылымдық жобалардың бірі жүзеге асырылып жатқан орын. Ауылда шамамен 150 адам тұрады. Биыл көктемде мұнда су құбыры жүйесінің құрылысы басталды.
Жергілікті билік өкілдерінің айтуынша, ауылдарды орталықтандырылған сумен қамтамасыз ету – бұл жай ғана қолайлы жағдай емес. Бұл – санитарлық қауіпсіздік, денсаулық, өмір сүру сапасын арттыру және демографиялық тұрақтылықтың кепілі.
«Бүгінгі күні Бірлікте геодезиялық жұмыстар аяқталды, бақылау белгілері орнатылды, құрылыс алаңында техника – экскаваторлар мен тиегіштер – жұмыс істеуде. «РаЗа Строй» ЖШС мердігер компаниясы барлық қажетті материалдарды жеткізді. Атап айтқанда, құбырлар, құдықтарға арналған бетон сақиналар, әрқайсысы 80 текше метрлік екі үлкен резервуар, жапқыштар мен гидранттар әкелінді. Қазір сорғы станциясының қоршауын орнату жұмыстары басталды. Одан кейін станцияның құрылысы басталады», – деп хабарлады аудандық әкімдік.
Жобаны қаржыландыру республикалық және облыстық бюджеттер есебінен қамтамасыз етілуде. Биыл бұл мақсатқа 334 миллион теңге бөлінді.
«Қосымша қаражат прокуратура органдары қайтарған активтер есебінен түсті. Барлық есеп айырысулар арнайы ашық шот арқылы жүзеге асырылады, бұл өз кезегінде қаражаттың ашықтығын және мақсатты пайдаланылуын бақылауға мүмкіндік береді», – деп түсіндірді Есіл ауданы әкімдігі.
Бірлік ауылындағы жаңа су жүйесі қыркүйек айының соңына дейін толықтай аяқталады деп күтілуде. Алайда бұл тек алғашқы қадам. Әкімдік атап өткендей, су құбырынан кейін өзге де жұмыстар атқарылады. Бірлік ауылында жол желісін дамыту, қоғамдық кеңістіктер құру және көгалдандыру жұмыстары жоспарланған.
Тағы оқыңыз: СҚО-да әскери жауынгер шекарадан заңсыз адам өткізген
