Сегізінші қарашада Солтүстік Қазақстан облысында 11 ауылдық округ әкімінің тікелей сайлауы өтеді. Шара өңірдің жеті ауданында ұйымдастырылады, деп хабарлайды Qazaqstan Media.
Сайлау әкімдердің өкілеттік мерзімінің аяқталуына, сондай-ақ мерзімінен бұрын тоқтатылуына байланысты тағайындалды. Тұрғындар мына ауылдық округтердің әкімдерін сайлайды:
* Аққайың ауданындағы Лесной ауылдық округі;
* Есіл ауданындағы Николаев және Спасов ауылдық округтері;
* Жамбыл ауданындағы Благовещенка ауылдық округі;
* Мағжан Жұмабаев ауданындағы Қарақоға ауылдық округі;
* Қызылжар ауданындағы Лесной және Рассвет ауылдық округтері;
* Тайынша ауданындағы Летовочный, Черемошнян және Яснополян ауылдық округтері;
* Уәлиханов ауданындағы Ақбұлақ ауылдық округі.
Сайлау науқаны басталып кетті. Кандидаттарды ұсыну бірінші қазаннан 13 қазанға дейін жалғасады. Үміткерлерді тіркелген саяси партиялары ұсына алады. Сонымен қатар өзін-өзі ұсынуға да мүмкіндік бар. Кандидаттарды тіркеу 18 қазанда аяқталады.
Сайлауалды үгіт-насихат жұмыстары кандидаттарды тіркеу аяқталғаннан кейін басталады. Ол 18 қазан сағат 18:00-ден кейін басталып, жетінші қараша күні түнгі сағат 00:00-де аяқталады.
23 қазаннан бастап сайлаушылар өздерінің учаскелеріндегі сайлаушылар тізімімен таныса алады. Сегізінші қараша — сайлау күні. Дауыс беру учаскелері жергілікті уақыт бойынша сағат 07:00-ден 20:00-ге дейін жұмыс істейді. Дауыстарды санау дауыс беру аяқталғаннан кейін бірден басталады.
Аудандық сайлау комиссиялары сайлау қорытындысын 11 қарашадан кешіктірмей шығаруы тиіс. Нәтижелері туралы ресми ақпарат 14 қарашаға дейін жарияланады.
Тағы оқыңыз: СҚО-да тұрақтандыру қоры азық-түлік бағаларын жариялады
