Солтүстік Қазақстан облысының прокурорлары мүгедектігі бар азаматтардың құқықтарының бұзылуын анықтады. Қадағалау органының тексерісі нәтижесінде жұмыс берушілердің заңсыз түрде жеке табыс салығын ұстағаны әшкере болды, деп жазады Qazaqstan Media.
2023–2024 жылдары Ақжар, Есіл, Мамлют, Тайынша, Шал ақын және Ғабит Мүсірепов аудандарында 366 мүгедектігі бар қызметкерден заңсыз түрде 16,9 миллион теңге жеке табыс салығы ұсталған. Бұл – Салық кодексіне тікелей қайшы.
Мәселен, Есіл ауданында білім бөлімінің лауазымды тұлғалары мүмкіндігі шектеулі балалардың 24 заңды өкілінен 1,7 миллион теңге салықты негізсіз ұстапты.
Прокурорлық шаралар нәтижесінде азаматтарға 6,2 миллион теңге қайтарылды. Қалған соманы өндіру бағытындағы жұмыс жалғасып жатыр.
Әлеуметтік осал топтардың құқықтарын қорғау – облыс прокуратурасының тұрақты бақылауындағы басым бағыттардың бірі.
Тағы оқыңыз: СҚО әкімі БАҚ қызметкерлерін төл мерекелерімен құттықтады
