Құрылтай депутаттары «2027–2029 жылдарға арналған республикалық бюджет туралы» заңды екінші оқылымда мақұлдап, үшінші оқылымда қабылдады. Құжатты талқылау кезінде президент Қасым-Жомарт Тоқаевтың тапсырмалары ескеріліп, бірқатар шығыс бағыттары қайта қаралды, деп хабарлайды Qazaqstan Media.
Жаңа бюджетте әлеуметтік салаға ерекше назар аударылған. Мемлекет қаржысының үштен бірінен астамын адами капиталды дамытуға және азаматтар алдындағы әлеуметтік міндеттемелерді орындауға жұмсау көзделіп отыр.
Құрылтайдың ресми Telegram арнасының мәліметінше, мемлекет басшысының 2026 жылғы 28 қазандағы Жолдауында айтылған бастамаларды іске асыруға 114,1 млрд теңге қарастырылған.
Соның ішінде ең төменгі жалақыны қазіргі 85 мың теңгеден 110 мың теңгеге дейін арттыру ұсынылған. Бұл көрсеткіш 25 мың теңгеге өседі.
Бұдан бөлек, алғашқы медициналық-санитарлық көмек саласында жұмыс істейтін медицина қызметкерлерінің жалақысын көтеру жоспарланған. Білім беру жүйесінде де өзгерістер күтіледі. Атап айтқанда, орта білім беру ұйымдарына жасанды интеллект технологияларын енгізуге қаржы бөлінбек.
Ал президенттің өзге де нақты тапсырмаларын орындауға 101,5 млрд теңге бағыттау көзделген.
Бұл қаражаттың бір бөлігі елордаға су жеткізу инфрақұрылымын дамытуға жұмсалады. Атап айтқанда, Сәтбаев атындағы каналдан Астанаға дейін су құбырын тарту жоспарланып отыр.
Сондай-ақ «Балқаш» атом электр станциясының жобасы аясында геологиялық барлау жұмыстарын жүргізу қарастырылған.
Тағы оқыңыз: Буллингтің алдын алып, ауыл кәсіпкерлерінің бизнесін дамытады: СҚО-да жасанды интеллект мүмкіндіктері таныстырылды

