Наурыз мерекесінде Солтүстік Қазақстан облысының әкімі Ғауез Нұрмұхамбетов Есіл ауданына барды. Өңір басшысы жаңа ашылған шығармашылық орталық — Nomads-AI-дың жұмысымен танысты. Мұнда технология, білім мен шығармашылық бір шаңырақ астында тоғысқан. Орталық ауыл жастарына цифрлық дағдыларын шыңдап, тың идеяларын жүзеге асыруға мүмкіндік береді, деп жазады Qazaqstan Media.
Орталықтың атауында да терең мән бар. Ол бір жағынан көшпенділердің еркін рухын еске салса, екінші жағынан жасанды интеллектіні меңзейді. Бүгінде Nomads-AI базасында төрт негізгі алаң жұмыс істейді. Олар — коворкинг аймағы, робототехника зертханасы, стартаптар бөлімі және медиастудия. Аудан әкімінің орынбасары Айнагүл Бекстасова қонақтарға шағын экскурсия өткізіп, орталықтың мүмкіндіктерін таныстырды.
«Біздің облыста осындай он бір орталық ашылды. Соның үшеуі дәл ауылдарда жұмыс істеп тұр. Бұл өте қуантарлық жағдай. Өйткені мұндай алаңдар экономика үшін аса қажет. Біз жастарымыздың туған жерінде қалып, осында еңбек еткенін қалаймыз. Сіздерге сәттілік пен бақ-береке тілеймін», — деді облыс әкімі Ғауез Нұрмұхамбетов.
Кездесудің ерекше сәттерінің бірі — ұлттық ойындардың цифрлық нұсқасының таныстырылымы болды. Жергілікті жасөспірімдер қазақтың дәстүрлі жарыстарын онлайн-симулятор форматында өздері жасап шыққан. Енді «Садақ ату», «Арқан тарту» және «Тоғызқұмалақ» ойындарын цифрлық кеңістікте ойнауға болады. Бұл жобалар жеке ойнауға да, желі арқылы екі адам болып сайысуға да мүмкіндік береді.
Өңір басшысы 3D модельдеу аймағындағы оқушылардың жетістіктерімен де танысты. 9-сынып оқушысы Кирилл Байпишев пен 11-сынып оқушысы Ксения Кошевая өздерінің үздік туындыларын көрсетті. Олар бұл іспен бірнеше жылдан бері айналысып келеді. Оқушылар алдымен арнайы бағдарламаларда макет әзірлеп, кейін оны 3D-принтер арқылы басып шығарады.
«Мен 3D модельдеумен бесінші сыныптан бері айналысамын. Алдымен үлгіні бағдарламада жасаймын, содан кейін принтер оны нақты пішінге айналдырады. Болашақта IT маманы немесе инженер болғым келеді. Бұл дағдылар өмірде міндетті түрде қажет болатынына сенімдімін», — деді Кирилл.
Технологиялық жаңалықтармен қатар, облыс әкіміне ауылды дамытуға қатысты алдағы жоспарлар да таныстырылды. Жақын уақытта Явленка ауылындағы орталық алаңды ауқымды жаңғырту жұмыстары басталады. Мұнда этностильде безендірілген заманауи балалар ойын алаңын салу жоспарланған. Жоба ұлттық нақыш пен балалар қауіпсіздігіне қойылатын заманауи талаптарды үйлестірмек.
Сондай-ақ ең әсерлі көріністердің бірі — компьютерлік ойындардың көрсетілімі болды. Жасөспірімдер ойындардың кодын өздері жазып, сюжеттерін де өздері ойлап табады. Бұдан бөлек, өңір басшысына робототехника саласындағы жетістіктер де көрсетілді.
Облыс әкімі мұндай жобалар өңір экономикасын нығайтып, жастарға туған жерінде өз қабілетін жүзеге асыруға үлкен жол ашатынына сенім білдірді.
Тағы оқыңыз: СҚО-ның Есіл ауданындаСергей Цырульников батырлардың білегін сынады
