СҚО-да этностар арасындағы бірлікті нығайтуға бағытталған форум өтті
Біз ата-бабамыз аңсап өткен «қой үстіне бозторғай жұмыртқалаған»заманда өмір сүріп жатырмыз. Бұл — елімізде тұрып жатқан 130-дан астам ұлт өкілінің бірлігі мен сыйластығының жемісі. Бұл бағытта әлі де ауқымды жұмыс атқарған жөн, деп хабарлайды Qazaqstan Media.
Осы мақсатта Петропавлда «Қазақстан бірегейлігін қалыптастыру және нығайту: Басшылардың біріктірудегі рөлі» атты форум өтті. Шараның шымылдығын облыс әкімі Ғауез Нұрмұхамбетов ашып, басқосудың маңыздылығына тоқталды.
СҚО-да этностар арасындағы бірлікті нығайтуға бағытталған форум өтті
«Әділдік пен билікке деген сенім тек алға жетелейді. Ал басшылар болса халықтың сеніміне ие болып, талмай еңбек ету қажет. Ата-бабамыз біз тәуелсіз болып өмір сүруіміз үшін аянбай еңбек етті. Олардың жолын ары қарай жалғастыру — басты міндет», — деді СҚО әкімі.
Тәуелсіз еліміздің басты құндылықтары — ұлтаралық татулық пен ынтымақтастық, ауызбіршілік пен тұрақтылық. Осылардың барлығын одан әрі нығайту, жоғалтпау — билік өкілдерінің басты міндеті. Бұл бағытта ҚР Президенті жанындағы Мемлекеттік басқару академиясы мен Қазақстан халқы Ассамблеясы ауқымды жұмыс атқарып келеді.
СҚО-да этностар арасындағы бірлікті нығайтуға бағытталған форум өтті
«Академия 2011 жылдан бері мемлекеттік қызметкерлердің біліктілігін арттырып, бағыт-бағдар көрсетіп келеді. Бізден түлеп ұшқан атқамінерлер елдің дамуына сүбелі үлес қосуда. Бірнешеуі лауазымды қызметте еңбек етеді. Бұл — біздің жүйелі жұмыс істеп жатқандығымыздың дәлелі», — ҚР Президенті жанындағы Мемлекеттік басқару академиясының ректоры Азамат Жолманов.
Мемлекеттің ертеңіне алаңдамас үшін сенім артар жастар тәрбиеленуі тиіс. «Ел боламын десең бесігінде түзе» деп ата-бабамыз бекерден-бекер айтпаған. Ұрпақты тәй-тәй басқаннан адалдық пен жауапкершілікке тәрбиелеу үшін дана ақсақалдарымыздың ақылы ауадай қажет. Шараның соңында өңірдің дамуына, ұлтаралық келісімді нығайтуға зор үлес қосқан жандар марапатталды.
