Солтүстік Қазақстан облысында әкімшілік полицейлер қыс басталғалы автожолдар мен көшелерде 160 тексеру жүргізді. Нәтижесінде жол қозғалысының қауіпсіздігіне кері әсерін тигізетін 65 олқылық анықталды, деп хабарлайды Qazaqstan Media тілшісі.
СҚО-да биыл көше-жол желісін күтіп ұстау жұмыстарына 500-ге жуық техника жұмылдырылған. Қыс басталғалы әкімшілік полицейлер жол және коммуналдық органдардың өкілдерімен бірлесіп, автомобиль жолдары мен көше-жол желісіне 160 тексеру жүргізді. Нәтижесінде 65 олқылық анықтаған. Кемшіліктерді жою бойынша 54 ұйғарым беріліп, жолдарды күтіп ұстауға жауапты 14 лауазымды тұлға әкімшілік жауапкершілікке тартылған.
«Әкімшілік полиция міндеттерінің бірі – автомобиль жолдарындағы қауіпсіз қозғалыс үшін жағдай жасау. Қыс басталысымен жол қызметтерінің жұмысы көбейді. Алайда олардың арасында өз ісіне жүрдім-бардым қарайтындар да бар. Сол себепті, жергілікті атқарушы органдарға қар жауған соң бірден тиісті қызметтер жұмыстарды жүргізу қажеттігі туралы ұсыным жіберілді», – дейді СҚО ПД әкімшілік полиция басқармасының жол-техникалық инспекциясы бөлімінің инспекторы Арман Сыздықов.
Тағы оқыңыз: Қызылшаны жұқтыру бойынша Қазақстан әлемде үшінші орында тұр
