Петропавлда Қазақстан халқы Ассамблеясының 30 жылдығына орай «Екі жұлдыз» вокалдық байқауы ұйымдастырылды. Бұл іс-шараға кәсіби әншілермен қатар, өнерге құштар жандар да қатысты, деп хабарлайды Qazaqstan Media тілшісі.
Іс-шараның ерекшелігі – әр дуэт ана тілінде емес, өзге тілде ән орындауы тиіс болды. Байқауға 11 дуэт қатысты. Олардың қатарында Шал ақын, Аққайың аудандары мен облыс орталығының өкілдері болды.
«Біз бұл байқауға жақсы дайындалдық. Әнді жаттау, тілдің дұрыс айтылуын үйрену біз үшін қызықты әрі пайдалы болды. Ең бастысы, сахнада өзімізді еркін ұстап, халыққа көтеріңкі көңіл-күй сыйладық. Мұндай шаралар әр ұлт өкілінің бірлігін көрсетеді деп ойлаймын», — деді байқауға қатысушылар.
Байқауға ересектермен бірге балалар да қатысып, ұрпақтар сабақтастығының жарқын үлгісін көрсетті. Репетициялар, костюмдер дайындау және сахнаға шығу алдындағы толқу – мұның бәрі бір арнаға тоғысып, ұлт өкілдерін біріктірді.
Байқау жеңімпаздары естелік сыйлықтармен марапатталды. Алайда, ең бастысы – бұл іс-шара достық пен бірліктің атмосферасын қалыптастырды.
