Уәлиханов ауданында қоршаған ортаны қорғау мен экологиялық мәдениетті қалыптастыруға бағытталған республикалық «Таза Қазақстан» акциясы кең көлемде жалғасуда. Осы бастама аясында бүгін аудан аумағында ауқымды экологиялық сенбілік ұйымдастырылып, оған жүзден астам тұрғын белсенді қатысты,деп жазады Qazaqstan Media.
Бұл жолғы тазалық шарасының негізгі алаңы жергілікті ипподром маңы мен оған іргелес орналасқан орман алқабы болды. Табиғаты көркем аймақты қоқыстан тазартуға ауданның еріктілері, жастар, мемлекеттік мекеме қызметкерлері және қоршаған ортаға бейжай қарамайтын тұрғындар жұмыла кірісті.
Сенбілік барысында қатысушылар орман ішіндегі тұрмыстық қалдықтарды жинап, демалыс аймақтарын ретке келтірді. Бірнеше сағатқа созылған бірлескен еңбектің нәтижесінде аумақ айтарлықтай тазарып, табиғи келбеті қайта жаңғырды. Ұйымдастырушылардың айтуынша, мұндай акциялар тек тазалық жұмыстарымен шектелмей, тұрғындардың экологиялық жауапкершілігін арттыруға да үлкен ықпал етеді.
Іс-шараға қатысқан жастар табиғатты қорғау — әр адамның азаматтық парызы екенін атап өтті. Олардың пікірінше, туған жердің тазалығы мен көркеюі әр тұрғынның жеке жауапкершілігінен басталады. Әсіресе, жас ұрпаққа экологиялық тәрбие беру және табиғатқа жанашырлықпен қарауды үйрету — бүгінгі күннің маңызды міндеттерінің бірі.
Акция барысында қатысушылар бірлік пен ұйымшылдықтың үлгісін көрсетті. Көпшілік табиғатты қорғау бағытындағы мұндай игі бастамалар алдағы уақытта да жалғасуы тиіс екенін жеткізді. Тұрғындардың айтуынша, таза қоршаған орта — денсаулық кепілі әрі болашақ ұрпаққа қалдырар ең үлкен мұралардың бірі.
Айта кетейік, «Таза Қазақстан» республикалық акциясы еліміздің барлық өңірінде өткізіліп келеді. Жобаның басты мақсаты — экологиялық мәдениетті қалыптастыру, елді мекендерді таза ұстау, табиғатты қорғауға қоғам назарын аудару және тұрғындарды ортақ іске жұмылдыру.
«Тазалық бар жерде — береке бар» демекші, аудан тұрғындары туған өлкенің тазалығы мен көркеюіне үлес қосуды жалғастыруда. Ұйымдастырушылар барлық тұрғындарды табиғатты аялауға, қоршаған ортаны таза ұстауға және экологиялық бастамаларға белсенді қатысуға шақырды.
Тағы оқыңыз: СҚО-да жыл басынан бері үш адам бруцеллез жұқтырған
