Қытай халықаралық білім көрмесі аясында ғылым және жоғары білім министрінің орынбасары Гүлзат Көбенова бастаған делегация Хэнань ауыл шаруашылығы инвестициялық тобының бас директоры Чэнь Хуайанмен кездесті. Кездесу барысында тараптар «Қазақстан-Қытай аграрлық технологиялар және экспортты дамыту технопаркі» жобасын іске асыру барысын талқылады, деп хабарлайды Qazaqstan Media.
Сондай-ақ кездесуде ауыл шаруашылығы, ғылым және технологиялар саласындағы ынтымақтастықты одан әрі тереңдету перспективаларын талқылады. Университет жобаны практикалық іске асырудың негізгі алаңы ретінде айқындалып, оның базасында дайындық жұмыстары, ғылыми сүйемелдеу және тәжірибелік ауыл шаруашылығы жұмыстарын ұйымдастыру жүргізілуде. Былтыр облыс әкімі Ғауез Нұрмұхамбетов бастаған делегацияның Қытайға сапары барысында Бейжің қаласында университет пен Хэнань ауыл шаруашылығы инвестициялық тобы арасында ынтымақтастық туралы меморандумға қол қойылды. Бұл құжат жобаны практикалық іске асырудың негізін қалады.
Бір жарым жыл ішінде қытайлық компания Өзбекстан, Малайзия және Қырғызстанды қоса алғанда, бірқатар елдерде жағдайларға салыстырмалы талдау жүргізді. Осы мақсатта облыс әкімдігі университетке көлемі 61 гектар жер учаскесін бөліп беріп, жобаны ұйымдастырушылық және инфрақұрылымдық тұрғыдан қамтамасыз етуде. Жоба ғылыми базаны дамытуға, заманауи аграрлық технологияларды енгізуге және кадрлар даярлауға бағытталған.
Жоба екі кезеңде іске асырылады. Бірінші кезеңде технопарк инфрақұрылымын құру, ғылыми өндірістік базаны қалыптастыру және заманауи технологияларды енгізу көзделген. Қытайлық серіктес тарапынан инвестиция көлемі шамамен 10 млн АҚШ долларын құрайды. Құрылыс аумағы шамамен 35 мың шаршы метрді қамтиды. Оның құрамына қойма кешендері, ғылыми-зерттеу және әкімшілік ғимараттар, жатақханалар, ауыл шаруашылығы техникасына арналған инфрақұрылым, сондай-ақ заманауи жылыжай кешендері кіреді.
Алдағы уақытта тараптар ынтымақтастықты одан әрі тереңдетуді жоспарлап отыр. Бұл Қазақстанның аграрлық секторын дамытуға және Қазақстан мен Қытай арасындағы стратегиялық әріптестікті нығайтуға маңызды үлес қосады.
Тағы оқыңыз: Петропавлда полицейлер үш мың литрден астам алкоголь тәркіледі
