Қала қараңғылықта қалмауы тиіс. Петропавл қаласының әкімі Серік Мұхамедиев қасбеттік жарығы бар барлық үйлерді тексеруді тапсырды. Бұрын орнатылған жарықты қайта жағу қажет екенін айтты, деп хабарлайды Qazaqstan Media.
Петропавл әкіміне қабылдауға қала тұрғыны Бейбіт Қожанов алғаш рет келіп отырған жоқ. Қазақстан Конституциясы көшесіндегі көпқабатты үйдің тұрғыны билікпен диалог нақты мәселе бойынша болғанда нәтиже беретінін жақсы біледі.
Алдында ол аулаға балаларға арналған ойын алаңын орнатуға көмек сұрады.
Өтініш кезекке қойылды. Сондықтан бұл жолы қала басшысымен кездесуін, әдеттегідей наразылықпен емес, алғыс айтудан бастады. Дегенмен жаңа көтерілген проблема да маңызды болды. Әңгіме қаланың басты көшесін аяқтайтын тоғыз қабатты үйдің қасбеттік жарығы туралы өрбіді.
«Бір жыл бұрын бұл үй жарқырап тұратын, көшенің нағыз визит картасы еді. Ал қазір қараңғыда қалып отыр», — деді қала тұрғыны.
Белгілі болғандай, мәселе техникалық сипатта: кабель зақымданған, автоматты қорғаныс іске қосылып кеткен. Үйге бұрынғы көркін қайтарып, қасбеттік жарықты қайта жағу үшін шығындарды қалалық бюджетке енгізу қажет.
Петропавл қаласының әкімі Серік Мұхамедиев жағдайды зерделеп, бұл мәселені келесі жылға арналған жоспарға қосуды тапсырды.
Сонымен қатар, ол бұрын қасбеттік жарық орнатылған барлық үйлерге түгендеу жүргізу жөнінде жеке тапсырма берді.
«Жалпы бұрын жарықтандырылған барлық үйлерді тексеріңіздер. Олар жарқырап тұруы керек», — деп түйіндеді қала басшысы.
Тағы оқыңыз: Биыл Уәлиханов ауданында 150 шақырым автомобиль жолы жөнделді
