Алдағы уақытта теріскейде танымал «REIMANN» компаниясының тіркемелі ауыл шаруашылығы техникасы өндірісі қолға алынбақ. Осының нәтижесінде, жинақтағыш бункерлермен, таразы жабдықтарымен жабдықталған көпфункционалды трактор тіркемелерінің жылына 150-і жиналатын болады, деп хабарлайды Qazaqstan Media тілшісі.
Соңғы жылдары облыс аумағында ауыл шаруашылығына қажетті техниканы жинастыру желісі кеңейіп келеді. Мәселен, 2023-те «XERION» тракторларының 100 бірлігі жиналды. Аймақ басшысы Айдарбек Сапаровтың сөзінше, болашақта «AXION» тракторларын жинастыру мүмкіндігі қарастырылады.
«Әлемдік ауыл шаруашылығы техникасын өндірушісінің HORSCH- заманауи өнімділігі жоғары егістік кешендерін жинастыру жұмыстары басталды. Бұл техниканың негізгі айырмашылығы — бір уақытта 4-5 операцияны орындайды. Тағы бір танымал «REIMANN» компаниясының тіркемелі ауыл шаруашылығы техникасы өндірісін іске қосуды жоспарлап отырмыз. Жобаның қуаттылығы — жылына 150 бірлік техника», — деді Айдарбек Сапаров.
Яғни, келешекте өңірде жинақтағыш бункерлермен, таразы жабдықтарымен жабдықталған көпфункционалды трактор тіркемелері дайындалмақ. Орталық коммуникациялар алаңында өңір жетекшісі облыста ауылшаруашылығы техникасының неғұрлым көп түрінің жиналуы өте маңызды екенін атап өтті.
«Бұл үрдіс фермерлер үшін өте тиімді болмақ. Яғни, құнды төмендетіп, машина-трактор паркінің жаңару қарқынын жеделдетеді. Аймақ үшін тағы бір маңызды жоба — жеңіл болат жұқа қабырғалы құрылымдар өндірісі. Олар тез салынатын рамалық ғимараттардың құрылысында қолданылады. Дизайнның артықшылығы — монтаждаудың маусымдық шектеулері жоқ, құрылыс кезінде ауыр техниканы қолданудың қажеті жоқ. Осылайша, нысандарды салудың қаржылық шығындары мен мерзімдері қысқарады», — деді облыс әкімі.
Тағы оқыңыз: СҚО-да сүт өндірісі 4,4%-ға өсті
