Қазақстандықтар жұмыс орнында отырыс жасап, спирттік ішімдік ішкен үшін айыппұл арқалауы мүмкін. Тіпті әкімшілік қамауға алынуы да ықтимал. Бұл туралы Қазақстан ІІМ хабарлады, деп хабарлайды Qazaqstan Media тілшісі Tengrinews.kz. сілтеме жасап.
Алкогольдік ішімдіктерді ішу немесе қоғамдық орындарда мас күйінде болу Қазақстанда әкімшілік құқық бұзушылық болып табылады. Ал қазақстандықтар жұмыс істейтін ұйымдар мен кәсіпорындардың көпшілігі қоғамдық орын санатында.
Оған білім беру және денсаулық сақтау ұйымдары, кітапханалары бар мұражайлар, өткізу режимін пайдаланбайтын мемлекеттік органдар мен ұйымдар, сондай-ақ өткізу режимі бар объектілердегі ұжымдар кіреді.
Сонымен қатар Әкімшілік құқық бұзушылық туралы кодекстің 440-бабына сәйкес, «алкогольдік ішімдіктерді сауда және қоғамдық тамақтандыру ұйымдарынан басқа көшелерде және басқа да қоғамдық орындарда ішу немесе қоғамдық орындарда мас күйі болу айыппұл салуға әкеп соғады». Оның мөлшері бес айлық есептік көрсеткіш (2024 жылы 18 460 теңге).
Егер бұл әрекеттер әкімшілік жаза қолданылғаннан кейін бір жыл ішінде қайталап жасалса, онда бұл он айлық есептік көрсеткіш мөлшерінде айыппұл салуға әкеп соғады (2024 жылы 36 920 теңге – шамамен.) немесе бес тәулікке дейінгі мерзімге әкімшілік қамауға алынады.
«Сонымен қатар, осы бап бойынша әкімшілік іс қозғау үшін жеке немесе заңды тұлғаның өтініші талап етілмейді», – деп нақтылады ІІМ.
Бұл дегеніміз, полиция қызметкерлері қоғамдық жерде алкогольдік ішімдіктерді ішудің және мас күйінде пайда болудың бір фактісі туралы хаттама жасай алады.
Тағы оқыңыз: Уәлиханов ауданының әкімі болып Мұрат Абдулов тағайындалды
