Қазақстанда конструктор-автокөліктерді заңдастыруға мүмкіндік берілді. Бұл туралы Үкіметтің тиісті қаулысы шықты, деп хабарлайды Qazaqstan Media тілшісі.
Мемлекет басшысының тапсырмасымен қазақстандықтарға 2022 жылғы 1 қыркүйекке дейін елімізге әкелінген шетелдік автокөліктерді заңдастыруға мүмкіндік берілді. Ал Қазақстанға қосалқы бөлшек ретінде әкелінген көлік иелері ресми тіркеу құжаттарының жоқтығынан қиындықтарға тап болған еді.
Премьер-Министрдің баспасөз қызметінің мәліметінше, Үкімет бұл мәселені шешу үшін азаматтарға конструктор-автокөліктерді заңдастыруға және бастапқы тіркеуден өткізуге мүмкіндік беретін тиісті ережелерге өзгерістер енгізді.
Мұндай көлік құралдарын бастапқы тіркеу үшін алым мөлшерлемесі 200 мың теңгені құрайды.
Тіркелу үшін:
1) өтініш;
2) ішкі істер органдарының уәкілетті қызметкері берген көлік құралын тексеріп-қарау актісі;
3) техникалық тексеріп-қараудың диагностикалық картасы болуы қажет.
Автокөлікті заңдастыру үшін өтінім Egov қызметі және екінші деңгейлі банктердің мобильді қосымшалары арқылы беріледі.
Тағы оқыңыз: Темекі тағы қымбаттайды
