2023 жылдың қорытындысы бойынша Петропавлда тіркелген қылмыстардың жалпы көрсеткіші 22,8% төмендеген. ПД баспасөз қызметінің мәліметінше, ұрлық саны — 30,2%, оның ішінде пәтер ұрлығы-29,5% азайды. Тонау 16,2% кеміген, деп хабарлайды Qazaqstan Media тілшісі.
Петропавл қаласы полиция басқармасының бастығы Марат Жұмалиевтің сөзінше, тәртіп сақшылары жүргізген профилактикалық жұмыстардың арқасында көшедегі қылмыс саны да 13,9% төмендеген.
«Петропавлда интернет алаяқтықтың алдын-алу бойынша да жұмыстар жүргізіліп жатыр. Жеті мың ақпараттық парақшалар жапсырылып, 18 мыңнан астам брошюралар таратылған. Сондай-ақ WhatsApp мессенджеріндегі үй чаттарына жадынамалар жіберілді. Жүздеген зейнеткер мен сонша ұйымда болып, қызметкерлер дәрістер өткізді. Олар тұрғындарға алаяқтардың айла-тәсілдерін түсіндірді. Нәтижесінде, өткен жылы 825 қала тұрғынының алдануына жол берілмеді», — дейді Петропавл қаласы полиция басқармасының бастығы Марат Жұмалиев.
Қазір облыс орталығындағы тыныштықты сақтау мақсатында 336 жаңа бейнекамера орнатылып жатыр.
Тағы оқыңыз:Петропавлда балаларды тамақтандыруға арналған сүт қоспасы енді берілмейтін болды
