Көпбейінді қалалық ауруханада 41 жастағы әйел жамбастан Хоффман аппаратын алып тастау үшін жоспарлы түрде жатқызылды. Көктемде биіктен құлаған науқастың жүрегі соқпай, алты минутқа тоқтап қалған болатын. Клиникалық өлім тіркелді. Дәрігерлердің біліктілігінің арқасында жүрегі қайта соғып, ажалдан аман қалды, деп жазады Qazaqstan Media.
Биылғы сәуір айында қала тұрғыны үйдің төртінші қабатынан терезе жуамын деп құлап, ауыр халде ауруханаға жеткізіледі. Құлағаннан кейін науқастың жүрек соғысы тоқтап, клиникалық өлім тіркеледі. Дегенмен дәрігерлердің жедел әрі кәсіби әрекетінің арқасында алты минуттан кейін жүрек қайта соға бастайды.
Науқастың өмірі үшін күрес осылай басталып кетті. Ол 24 күн бойы өкпені жасанды желдету аппаратына қосылып, жансақтау бөлімінде жатады. Оған бас сүйек-мидың ауыр жарақаты,бас сүйегінің, екі жақтың, иықтың, кеуде омыртқасының, жамбастың сынуы, 3B типті күрделі жамбас сынуы, өкпе жарақаты, гемопневмония, құлақ қалқанының жарылуы, тыныс алу жеткіліксіздігі және өзге де асқынулар деген диагноз қояды.
«Бір ай ішінденауқасқа үш күрделі операция жасалды. Кейінірек қосымша екі хирургиялық ота сәтті аяқталды. Қазіргі уақытта пациент травматология бөлімінде ем қабылдап жатыр. Жағдайы орташа ауыр. Осы жолы жасалған алтыншы операцияда сыртқы бекіткіш құрылғыны алып тастау үшін жасалды»,-деп хабарлады аурухана мамандары.
Бұл оқиға — медицина қызметкерлерінің кәсібилігі мен адам ерік-жігерінің, өмірге деген құштарлықтың нақты дәлелі. Ең маңыздысы — науқас тірі қалды және өмір жолын жалғастыруда.
Тағы оқыңыз: Солтүстікқазақстандық дәрігер көкшетаулық азаматтың өмірін аман алып қалды
