Оңтүстік Кореяда алауы тұтанатын қысқы Жасөспірімдер Олимпиадасының ашылу салтанатында еліміздің Көк Туын ұстап шығатын спортшылар белгілі болды. «Мемлекеттер шеруі» кезінде Қазақстанның байрағын қызылжарлық конькимен жүгіру спортының өкілі Кристина Шумекова мен оралдық шорт-трекші Ерасыл Шыңғысхан алып шығады, деп хабарлайды Qazaqstan Media тілшісі.
Бұл туралы ҚР туризм және спорт министрлігінің сайтында жазылды. Аталған спортшылар жарыстардағы жоғары жетістіктері үшін ғана емес, сонымен қатар халықаралық аренадағы жеңіске деген жігері үшін таңдалды. Он сегіз жасар Кристина Шумакова конькимен жүгіру спортынан ҚР спорт шебері, өзінің жас санатында Қазақстан Республикасының чемпионы, 2023 жылғы Әлем Кубогының итальяндық кезеңінің күміс жүлдегері.
Он жеті жасар Ерасыл Шыңғысхан шорт-тректен спорт шеберіне кандидат, өзінің жас санатында Қазақстан Республикасының чемпионы, сондай-ақ «Азия балалары-2023» халықаралық жарысының күміс жүлдегері.
«Бұл – мен үшін өте әсерлі сәт. Жасөспірімдердің қысқы Олимпиадасында Қазақстанды таныстыру – абыройлы міндет қана емес, үлкен жауапкершілік. Мен жарыс жолында бар күш-жігерімді салуға уәде беремін. Төрт жылдықтың басты додасына қатысатын әрқайсымыз Олимпиада медалін жеңіп алғымыз келеді және бұл Олимпиада біздің осы мақсатқа жету жолындағы тамаша мүмкіндігіміз», — деп өз әсерімен бөлісті Кристина Шумекова.
Олимпиадаға дайындық штабының басшысы Елсияр Қанағатов Ту ұстаушылардың дұрыс таңдалғанына сенімді екенін жеткізді.
«Кристина мен Ерасыл – біздің мықты әрі ұйымшыл командамыздың жарқын өкілдері. Оңтүстік Кореяға баратын жасөспірімдер құрамасы мүшелерінің бойынан олардың кәсібилігі, ынта-жігері мен спортқа деген адалдығы айқын көрініп тұр. Аталған спортшылар – ел спортының жаңа буыны, біз олардың қысқы Жасөспірімдер Олимпиадасында өнер көрсетуін асыға күтеміз. Сонымен қатар жас спортшылар Ойындарға қатысу арқылы тек тәжірибе жинап қана қоймай, өз шеберліктерін шыңдау жолында құнды сабақ алады», — деді Елсияр Қанағатов.
Айта кетейік, Канвон-2024 IV қысқы Жасөспірімдер Олимпиадасы 19 қаңтардан 1 ақпанға дейін Оңтүстік Кореяның Канвон провинциясында өтеді. Азия құрлығында алғаш рет ұйымдастырылып жатқан Жасөспірімдердің қысқы Олимпиадасына әлемнің 50 елінен 1800 спортшы қатысады. 7 спорт түрінен 81 медаль сарапқа салынады. Қазақстан құрамасының 42 спортшысы 5 спорт түрі бойынша бақ сынайды.
Тағы оқыңыз: Су тасқыны қаупі бар өңірлер белгілі болды
