Петропавлдық Татьяна Геворкян Ойқала шағын ауданының бұрынғы тұрғыны. Тасқын кезінде үйі су астында қалып, мамандар мамыр айында баспанасын тұруға жарамсыз деп тапқан. Осылайша, Татьяна Геворкян 2 ай күтіп «Бірлік» шағын ауданындағы жаңа баспанаға ие болды, деп хабарлайды Qazaqstan Media тілшісі.
Қала тұрғынына «Бірлік» шағын ауданындағы жаңа үйдің кілті 27 шілде күні табысталды. Баспана тұрғынның көңілінен шыққан. Енді ол, үйдің жан-жағына гүл отырғызып, бау-бақша екпек. Тұрғынның бұрынғы баспанасының ауданы 28 шаршы метр болса, қазіргі үйінің ауданы 80 шаршы метр. Татьяна қазіргі таңда 100 АЕК көлеміндегі жәрдамақыға үйіне қажетті керек-жарақтың біразын сатып алған.
«Петропавлда тасқын болып, үйім су астында қалған кезде мен Ресейде болдым. Жаңалықтарды БАҚ-тан, жақындарымнан біліп отырдым. Кейін 1 аптадан кейін елге келдім. Бізге таңдау берілген кезде,осы «Бірлік» ауданындағы жер үйді таңдадық. Жаңа үйіме жақын болсын деп емханаға да жұмысқа орналастым. Автобуспен барып келемін. Ең бастысы, ыңғайлы, өзіме ұнайды», — деді Татьяна Геворкян.
Тағы оқыңыз:СҚО полицейлері көрші елдерде іздеуде жүрген 24 қылмыскерді ұстады
