СҚО-да орақ науқаны қарқынды жүріп жатыр. Диқандар бірнеше күннің ішінде 486 мың гектар аумақтағы астықты жинап үлгеріпті, деп хабарлайды Qazaqstan Media.
Өңірлік коммуникациялар қызметінің баспасөз алаңына келген облыстың бас диқаны Дәурен Токужинов орақ науқаны жайлы ақпармен бөлісті. Айтуынша, қазіргі таңда облыста дәнді және бұршақты дақылдарды жинау жұмыстары жүргізілуде. Бүгінгі күні 486 мың гектарға немесе жалпы аумақтың 16,1 пайызындағы астық жиналыпты.
«Өнімділік көрсеткіші — 14,5 центнер. 706,9 мың тонна астық қамбаға жеткізілді. Бұршақ пен жасымықты соғу жұмыстары 65 пайызға орындалды»,- деді Дәурен Токужинов.
Брифинг барысында спикер көңіл қуантарлық астық жинап жатқан агроқұрылымдарды да атады. Олар: «Шатило и К», «Прометей-Агро», «Кантемир Агро», «Рустикус». Теріскейдің құнарлы алқаптарынан жиналған бұршақты дақылдар экспортталып та жатыр. Бүгінде 85 мың тоннадан астам өнім шет елге сатылған.
«Өнімді сыртқы нарыққа шығару қиындық туғызбайды: фитосанитариялық паспорт пен экспорттық сертификат екі жұмыс күнінде ғана беріледі. Мағжан Жұмабаев ауданында «СК Агро» серіктестігі жасымықты Түркияға жөнелтеді. Жүк көліктері келіп, тауарды бірден алып кетеді. Жасымықты өсіруге бидаймен бірдей шығын жұмсалады. Алайда оның нарықтық құны 2,5 есе жоғары»,- деді басқарма басшысы.
Тағы оқыңыз: Уәлиханов ауданында Конституцияның 30 жылдығы кең көлемде аталып өтілді
