СҚО полицейлері қаладағы кәсіпорындардың бірінен 4,5 млн теңгені ұрлаған күдіктіні «ізін суытпай» ұстады, деп жазады Qazaqstan Media тілшісі.
Оқиға демалыс күндері Петропавлдағы кәсіпорындардың бірінде болған. Компаниядан ақша ұрланғандығын таңертең жұмысқа келген қызметкерлер байқаған. Олар бірден полицияға хабарлап, кеңсенің терезесі ашық тұрғанын және сейфтің бұзылғандығын айтқан.
«Қызметкерлер көрсеткен сейфте тағы бір кішкентай сейф болған. Ал оның ішінде 4,5 млн теңгеден астам қаржы жатқан. Түн ортасына жақын полиция қызметкерлері 50 жастағы қала тұрғынын ұстады. Жеке кәсіпкердің жұмысшылары оны бірден таныды. Ер адам бұған дейін кеңсенің кіреберіс есігіндегі құлыпты ауыстырған екен. Күдікті қамауға алынды. Қазіргі уақытта бұл факті бойынша қылмыстық іс тергеліп жатыр», — деп хабарлады облыстық полиция департаментінің баспасөз қызметі.
Ұрланған ақшаның бір бөлігін 50 жастағы азамат жұмсап үлгерген. Ал қалғаны тәркіленді. Осы әрекеті үшін ол 5 жылдан 10 жылға дейінгі мерзімге бас бостандығынан айырылуы мүмкін.
Тағы оқыңыз: Төбесі құлайын деп тұр: СҚО-да ауыл мектебі жабылды
