Солтүстік Қазақстан облысындағы Қызылжар ауданына қарасты Белое орта мектебі уақытша жабылды. Себебі, оқу ордасындағы тарих кабинетінің төбесі майысып, құлайын деп тұр. Қазір оқушылар көрші Пенькова ауылындағы мектепте білімдерін жалғастырып жатыр, деп жазады Qazaqstan Media тілшісі.
Қызылжар ауданындағы Белое орта мектебінің қабырғасы 1964 жылы қаланған. Бір қабатты ғимаратта бүгіндері 116 оқушы білім алуда. Демалыс кезінде мектеп әкімшілігі тарих кабинетінің төбесі майысып тұрғанын байқаған.
Бір қызығы, мектептің шатыры өткен жылы жаңартылған екен.
«Үш жыл бұрын техникалық сараптама жүргізілген болатын, ол кезде мектеп апатты деп танылмады. Сондықтан оқу штаттық режимде жүргізілді. Білім ордасының негізі қаланғалы бері күрделі жөндеу жүргізілмеген. Тек жыл сайын ағымдағы жөндеу жұмыстары жасалып отырды. Ал наурыз айының 23-і тарих кабинетінің төбесі майысып тұрғаны анықталып, біз мектептің жұмысын тоқтаттық. Қазір «Стадия» ЖШС-мен келісімге отырып, олар технкиалық сарапатама жасап жатыр. Соның қорытындысы бойынша, әрі қарай шешім қабылдатын болады. Айта кету керек, білім басқармасына Белое ауылына жаңа мектеп салу бойынша өтініш түскен жоқ», — деді облыстық білім басқармасының басшысы Айнагүл Сұрағанова.
Каникулдан шыққан Белое орта мектебінің оқушылары төртінші тоқсанның алғашқы екі күнінде үйде қалып, онлайн форматта оқыған. Ал қазір олар оқуын көрші Пенькова ауылында жалғастырып жатыр. Білім басқармасы оларды тасымалдау үшін екі ГАЗель мен бір автобус бөлген.
«Пенькова ауылында да орта мектеп. Ол 320 балаға шақталған. Дегенмен онда қазір 185 оқушы білім алып жатыр. Пенькова ауылының балалары таңертең оқиды. Ал Белое ауылының оқушылары екінші кезеңде оқытылып жатыр. Оқу жоспары бекітілді, ата-аналардың келісімі бар. Тамақтану жағы да шешілді. Белое ауылының 30 мұғалімі де жұмыстарын Пеньковада жалғастырып жатыр», — деді Айнагүл Сұрағанова.
Тағы оқыңыз: СҚО-да ауыл әкімі орнатылмаған мұз қалашығын қабылдап алған
