Петропавлда ҚР Полициясы күніне орай салтанатты жиын өтті. Айтулы датаға орай 30-дан астам тәртіп сақшысы түрлі марапатқа ие болды, деп хабарлайды Qazaqstan Media.
Күні түні олар қоғамдық тәртіпті күзетеді. Тыныштықты сақтайды. Ел амандығы үшін өз өмірлерін қауіпке тігеді. Шенділердің еңбегін облыс әкімі жоғары бағалады.
Мерекелік шарада қызметтік міндеттерін адал атқарып, жұмыста жоғары жетістікке жеткен бірқатар азамат марапатталды. Олардың қатарында қалалық ПБ бастығының орынбасары Қайырбек Баймөнкенов те бар. Оған бүгін мерзімінен бұрын подполковник шені табысталды.
«Полицей болу — бала кезгі арманым. Аталған салада 13 жылдан бері еңбек етіп келемін. Тәртіп сақшысының адамгершілігі мол болу қажет. Қай кезде болмасын адамдардан көмегін аямауы тиіс. Барша әріптестерімді мерекемен шын жүректен құттықтаймын!»,-дейді Қайырбек Баймөнкенов.
Басқосуда ел қорғандарына облыс әкімі Ғауез Нұрмұхамбетов 26 су жаңа автокөліктің кілтін табыстады. Бұл темір тұлпарлардың қиындығы мол қызметте зор көмегі тиері сөзсіз.
Тағы оқыңыз: Тайынша ауданындағы газ жарылысы кезінде өрт сөндірушілер зардап шеккен
