Солтүстік Қазақстан облысының прокурорлары петропавлдық бизнесмен Вадим Приходченко мен оның отбасын өлтірген қылмыскерлерге тағайындалған жазамен келіспей отыр. Олар бірінші инстанциядағы сот үкіміне апелляциялық шағым түсірді, деп хабарлайды Qazaqstan Media.
Қазан айының 28-і СҚО қылмыстық істер жөніндегі мамандандырылған ауданаралық соты петропавлдық бизнесмен Вадим Приходченко мен оның отбасын өлтірді деп айыпталған үш азаматқа үкім шығарды. Сот Сергей Емельяновты өмір бойына, Данил Орловты 21 жыл сегіз айға бас бостандығынан айырды. Ал Ирина Скоробогатова ҚР ҚК 434 бабында көзделген қылмыстық құқық бұзушылық жасағаны үшін кінәлі деп танылып, үш жылға бас бостандығынан айырылды. Аталған үкіммен облыс прокуратурасы келіспей, апелляциялық шағым түсірген.
«Облыстық прокуратура Орлов пен Скоробогатоваға шығарылған сот шешімі тым жұмсақ деп есептейді. Осыған байланысты 2024 жылғы 12 қарашада облыстық сотқа апелляциялық өтініш енгізілді», — деді Петропавл қалалық прокуратурасының бөлім прокуроры Кенесары Мұхамеджанов.
Жәбірленуші тарап та мұндай шешіммен келіспей отыр. Жақында қаза тапқандардың қызы видео үндеу жазып, осы мәселеге жалпақ жұрттың назарын аударды. Ол әке-шешесі мен бауырын өлтірген Данил Орловты өмір бойына бас бостандығынан айыру қажет дейді. Ал оларды бұл қылмысқа итермелеген Ирина Скоробогатованы алғашқы бетте айыптаған ҚР ҚК 28 бабы 4 бөлігі (Басқа адамды азғыру, параға сатып алу, қорқыту жолымен немесе басқа да тәсілмен қылмыстық құқық бұзушылық жасауға көндiрген адам айдап салушы деп танылады) бойынша жазалауды сұрайды.
Айта кету керек, қазір Татьяна Приходченко отбасылық бизнесті жалғастыруда. Бірақ әлі тендерлерге қатыспаған.
«Қазір біз жерлеу рәсімдеріне қажетті киім-кешек, табыттар мен гүл шоқтарын сатумен айналысамыз. Әзірге, мен тендерлерге араласқан жоқпын. Араласқым да келмейді. Шыны керек, қорқамын», — деді қайтыс болғандардың қызы Татьяна Приходченко.
Тағы оқыңыз: 15 қараша – ұлттық валюта күні
