Уәлиханов ауыл шаруашылық колледжінің студенттеріне кәсіби бағдар беру экскурсиясы ұйымдастырылды. Жастар «Солтүстік Нива» ЖШС-на барып қайтты. Болашақ ауыл шаруашылық саласының мамандары астықты қабылдау, өңдеу және сақтау бойынша заманауи кәсіпорынның жұмысын тәжірибе жүзінде көрді, деп жазады Qazaqstan Media.
Экскурсияны жастар ресурстық орталығы мен Amanat партиясының аудандық филиалы ұйымдастырды. Бұл студенттерге аудиторияда оқып жүрген теорияның тәжірибеде қалай қолданылатынын көруге мүмкіндік берді.
«Біздің мақсатымыз – тек кәсіби бағдар беру емес, сонымен қатар жастарға нақты еңбек жағдайларымен танысуға мүмкіндік жасау. Бұл оларға болашақтағы жұмысқа орналасу туралы ойлануға және мамандықты саналы таңдауға көмектеседі», – деп атап өтті Уәлиханов аудандық жастар ресурстық орталығы директорының міндетін атқарушы Салтанат Исина.
Экскурсия барысында студенттер кәсіпорынның толық жұмыс циклімен танысты: астықтың қабылдануынан бастап сақтауға және жөнелтуге дейін. Алдымен олар кеңсе мен кіреберісті аралап, зертханаға барды. Онда мамандар астықтың сыныбын қалай тексеретінін, сапасын талдауға арналған жабдықтарды көрсетті.
«Балалар жұмыстың барлық кезеңін көрді: астықтың элеваторға қалай жеткізілетінін, машиналардан қалай түсірілетінін, іріктеліп, қоспалар мен шаңнан тазартылып, кептіріліп, сақтауға жіберілетінін. Бұл студенттер үшін құнды тәжірибе болды, өйткені колледжде олар осы процестердің барлығын негізінен теория жүзінде оқиды», – деді Салтанат Исина.
Студенттердің ерекше қызығушылығын элеватор, диірмен мен астық қоймалары тудырды. Оларға өндірістік нысандардың кейбіріне кіруге де рұқсат етілді. Онда жастар заманауи құрал-жабдықтың қалай жұмыс істейтінін өз көздерімен көрді.
«Біз студенттердің өте белсенді болғанын байқадық. Олар сұрақтар қойып, техникаға қызығушылық танытты, жабдықтарды қарап, тіпті кейбір процестерді өздері іске қосып көрді. Әсіресе, жігіттерге жаңа КамАЗ көліктерін, ұсатқыштарды, зертханалық аппараттарды көру қызық болды. Бұл олар үшін заманауи ауыл шаруашылығы жаңа технологиялық деңгейге көтерілгенін түсінудің нақты мүмкіндігі», – деді ол.
Экскурсияға болашақ тракторшылар, аспаздар мен бухгалтерлер – жоғары курс студенттерінен шамамен 30 адам қатысты. Оларға оқытушылар мен топ кураторлары да еріп барды. Олар да мұндай іс-шаралардың білім беру процесі үшін маңыздылығын атап өтті.
«Көптеген студенттер алғаш рет астықтың жиналғаннан кейін қалай өңделетінін көрді. Олар үшін астықтың жолы тек егу және жинаумен шектелмей, сақтау мен өңдеудің тұтас кешенін қамтитыны жаңа тәжірибе болды», – деді бастапқы әскери дайындық пәнінің оқытушысы Ермек Дәулетжанов.
Кәсіпорын мамандарының жұмысы да студенттердің қызығушылығын арттырды. Олар учаске шеберіне көп сұрақ қойып, жабдықтардың ерекшеліктерін сұрап білді.
«Менің ойымша, мұндай сапарлар өте пайдалы. Балалар аудиторияда тек теория тыңдап қана қоймай, өндірістік процестің қалай ұйымдастырылғанын практика жүзінде көреді. Бұл оларға болашақ мамандықты жақсы түсінуге және жұмыс таңдауға саналы қарауға көмектеседі», – деп атап өтті оқытушы.
Қазіргі уақытта колледжде үш негізгі мамандық бойынша шамамен 150 студент оқиды: ауыл шаруашылығын механизациялау, есеп және аудит, сондай-ақ қоғамдық тамақтандыруды ұйымдастыру және тауартану.
«Әрине, мұндай кәсіпорындарға барлық студенттер бірден бармайды, тек қызығушылық танытқандары ғана қатысады. Бірақ біз әртүрлі балаларға өндірісті көруге мүмкіндік беруге тырысамыз. Бұл олардың көкжиегін кеңейтіп, болашақта осы салада жұмыс істеуге ынталандыруы мүмкін», – деп қосты Ермек Дәулетжанов.
«Солтүстік Ниваға» экскурсия – биылғы оқу жылындағы алғашқы сапар болды. Алда оларды егіс және орақ науқаны кезінде өндірістік тәжірибе күтіп тұр. Сол кезде де студенттер білімдерін нақты жағдайда бекіте алады.
Тағы оқыңыз: СҚО-да полицейлер жолдағы бақылауды күшейтуде
