«Солтүстік–2026» мерекесінде Уәлиханов ауданының спортшылары жеңіс үшін күресуде
Солтүстік Қазақстан облысында ауқымды қысқы спорт мерекесі – «Солтүстік–2026» өтуде. Жарыстар 19–22 ақпан аралығында Жамбыл ауданының Пресновка ауылында ұйымдастырылуда. Облыстың түкпір-түкпірінен келген командалар хоккей, футзал, шорт-трек және шаңғы жарысы бойынша бақ сынауда. Уәлиханов ауданының өкілдері турнирге үлкен дайындықпен келіп, қазірдің өзінде жақсы нәтижелер көрсетуде, деп жазады Qazaqstan Media.
Жеңіске деген жігер
Облыстық біріншілікте Уәлиханов ауданының намысын 68 спортшыдан құралған ауқымды делегация қорғауда. Құрама сапына Кішкенекөл, Ақтүйесай, Ақбұлақ және Көктерек ауылдық округтерінің үздік спортшылары енген. Команда белсенді жастардан, студенттерден және тәжірибелі ересек спортшылардан құралған. Уәлиханов ауданы әкімінің орынбасары Талғат Сағитов спортшылардың дайындық деңгейінің жоғары екенін және бұл шараның маңыздылығын атап өтті:
«Мерекеге дайындық жоспарлы түрде өтті, спортшыларымызға барлық қажетті жағдай жасалды. Біз Пресновкаға нақты мақсатпен — спартакиада жүлдегері атану үшін келдік. Өйткені ауданда спортты дамыту мен салауатты өмір салтын насихаттауға арналған мықты база қалыптасқан. Осындай спорттық мерекелердің өтуі — дені сау ұлт қалыптастыруда және жастарды тұрақты түрде дене шынықтырумен айналысуға тартуда аса маңызды. Барлық қатысушыларға сәттілік, мықты денсаулық және амандық тілеймін!» — деді Талғат Сағитов.
Шаңғы жолы мен мұз айдынының қаһармандары
Алғашқылардың бірі болып шаңғы жарысына облыстың өткен жылдардағы чемпионы, 19 жастағы Анисия Адмаева шықты. Ол Кішкенекөл ауылында тұрады және жетінші сыныптан бастап спортпен айналысады. Жарыстың алғашқы күні ол бес шақырымдық қашықтықты сәтті еңсерді.
«Солтүстік–2026» мерекесінде Уәлиханов ауданының спортшылары жеңіс үшін күресуде
«Жол өте жұмсақ әрі жақсы дайындалған, бәрі ұнады. Қарсыластар мықты болды, тартысты бәсеке өтті. Өз нәтижеме ризамын», — деді Анисия.
Сонымен қатар шаңғы жарысында аудан намысын спорт шеберлігіне кандидаттар Мирас Рысқұлов пен Мұхамед Кизатов қорғауда. Шаңғы жарысынан кейін көрермендердің назары мұз айдынына ауысты. Мұнда шорт-трек бойынша жарыстар басталды. Әділ Молдиманов алғашқы кезеңнен сәтті өтіп, ширек финалға шығу үшін күресуде.
«Біздің ауылда жаттығуға барлық жағдай жасалған: мұз айдыны да, жылы шешінетін орын да бар. Жақында Петропавлда өткен жарыста жүлдеден бір сәтке ғана қалып қойдым, бұл маған әрі қарай тынымсыз еңбектенуге мотивация берді», — деді Әділ.
Шорт-трек бойынша әйелдер құрамасы да жүлде үшін белсенді түрде күресуде. Құрама сапында тәжірибелі спортшылар Аружан Өсербай, Ажар Тайбасарова және Диляра Айтимова бар. Болашақ географ Аружан туған ауданының намысын қорғауды жалғастыруда. Бұл оның алғашқы ірі жарысы емес. Бұған дейін ол Ақжар және Тимирязев аудандарында өткен жарыстарға қатысқан.
«Солтүстік–2026» мерекесінде Уәлиханов ауданының спортшылары жеңіс үшін күресуде
«Мен шорт-трекпен жетінші сыныптан бастап Абзал Сабыржанұлының жетекшілігімен айналысып келемін. Бұл спорт мені қатты жігерлендіреді. «Солтүстік» мерекесі бізге өзімізді көрсетуге тамаша мүмкіндік береді. Командамыз жақсы нәтиже көрсетеді деп үміттенемін», — дейді Аружан Өсербай.
Мұз айдынындағы фавориттердің қатарында облыстың күміс жүлдегері Мирас Садыков та бар. Пресновкадағы мереке 22 ақпанда аяқталады. Жергілікті Мәдениет үйінде салтанатты жабылу рәсімі өтіп, жалпыкомандалық есептің жеңімпаздары анықталып, облыстың үздік спортшылары марапатталады.
