Солтүстікқазақстандық полицейлер облыс жолдарында бірнеше бейнебақылау ақпараттық-бағдарламалық кешенін орнатты. Мәселен 10-шы маусымнан бастап «ақылды» камералар Бескөл мен Бәйтерек ауылдарының негізгі кіреберістерінде жұмыс істеп тұр, деп жазады Qazaqstan Media.
Петропавлда фото және бейне тіркегіш орнатылған жолдарда ауыр жол-көлік оқиғалары тіркелмеген. Осыны ескере отырып және азаматтардың өтініштерін ескеріп, полицейлер бұл жүйелерді қала маңындағы жолдарға да енгізу жұмыстарын жалғастыруда.
Бүгінде облыста 67 «интеллектуалды» бейнебақылау аппараттық-бағдарламалық кешені жұмыс істейді. 10 маусымнан бастап қозғалыс қарқыны жоғары Қызылжар ауданының шеткі аймақтарында тағы бес жаңа құрылғы іске қосылды. Олар «Жезқазған – Петропавл» трассасындағы Бескөл мен Бәйтерек ауылдарының негізгі кіреберістерінде, «Астана – Петропавл» жолындағы «Altiro» кафесінің маңында және «Челябі – Новосібір» трассасындағы Белое ауылының негізгі кіреберісінде орнатылған.
«Бұдан бөлек, «ҚазАвтоЖол» ҰК» АҚ «Ақылы автомобиль жолдары дирекциясы» филиалы «Көкшетау – Петропавл» автожолында Бескөл, Астраханка және Драгомировка ауылдарының маңындағы аркаларға жылдамдықты автоматты өлшеу құралдарын орнатты. Жүргізіліп жатқан жұмыстың мақсаты – өңір жолдарындағы апаттар санын азайту»,- деп нақтылады СҚО ПД баспасөз қызметі.
Биыл жыл басынан облыс аумағында 184 жол-көлік оқиғасы тіркеліп, жеті адам қаза тапты. 256 адам түрлі дене жарақатын алды.
Тағы оқыңыз: СҚО көлік бақылауы инспекциясына жаңа басшы тағайындалды
