СҚО-да жеңіл атлетикадан жасөспірімдер арасындағы облыс чемпионаты басталды
Түрлі қашықтыққа жүгіру, ядро лақтыру, ұзындыққа секіру. Петропавлда жеңіл атлетикадан жасөспірімдер арасындағы облыс чемпионаты басталды, деп хабарлайды Qazaqstan Media.
Бәсеке екі күнге созылады. Кіл мықтылар анықталатын жарыс өңірдің түкпір-түкпірінен келген 40-тан астам жастың басын қосты.
«Қыркүйекте Шымкент қаласында Қазақстан чемпионаты өтеді. Дүбірлі додаға облыстан кіл мықтылар баруы тиіс. Сондықтан да осы жарысты өткізіп отырмыз. Ұл-қыздардың аяқ алысы жаман емес. Жалпы, СҚО — жеңіл атлетикадан ел көлемінде үздіктердің қатарында. Барған бәсекелердің барлығынан жүлдесіз қайтпаймыз»,- деді жеңіл атлетикадан СҚО аға жаттықтырушысы Кирилл Бабич.
Бүгін жекелей және эстафеталық жарыс өтті. Яғни, командалық сайыс. Әр құраманың қатарында 5 қатысушыдан. Бұл бәсекеде айыртаулықтардың мерейі үстем болды. Қызылжар ауданынан келген жастар жеңімпаздарға айтарлықтай қарсылық көрсетті.
СҚО-да жеңіл атлетикадан жасөспірімдер арасындағы облыс чемпионаты басталды
«60 метр қашықтыққа жүгіруден 4-ші орынға ие болдым. Жүлдеге сынық сүйем жетпей қалды. Өзімнің қателігім деп есептеймін. Басында сәл кідіріп қалдым. Бірақ, мұнымен тоқтап қалмаймын. Алда жарыс көп қой. Мықтылығымды дәлелдеуге мүмкіндік бар»,- деді жарысқа қатысушы, Қызылжар ауданы.
Облыс чемпионатына біраз ауданның өкілдері келмепті. Оған себеп — қаржылық қиындықтар. Айта кету керек, жарыс қорытындысы бойынша 5 қыз, 5 ұл бала ел чемпионатында өңір намысын қорғайды.
