Солтүстік Қазақстан облысында туберкулезбен күрес жұмыстары өз нәтижесін беріп жатыр. 2025 жылдың алғашқы алты айында туберкулезбен ауыратындар саны былтырғы жылмен салыстырғанда азайған. Бұл туралы облыстық фтизиатрия қызметі мәлімдеді, деп жазады Qazaqstan Media.
Жарты жылда туберкулезге шалдыққандар саны 14,7 пайызға кеміген. Былтыр 101 адам ауырса, биыл бұл көрсеткіш 85 адам болған. Аурудың таралуы да азайып отыр – бұл дегеніміз, өңірде туберкулезбен ауыратын адамдар саны азайып келе жатыр деген сөз.
Ең қуанышты жаңалық – балалар мен жасөспірімдер арасындағы ауру санының төмендеуі. 15–17 жастағы жасөспірімдер арасында былтыр 6 адам ауырса, биыл тек 1 жағдай тіркелген. 0–17 жас аралығындағы балаларда да сырқаттанушылық 50 пайыздан астамға азайған.
Туберкулезді ерте анықтау үшін халық флюорографиялық тексеруден өтіп жатыр. Жоспар бойынша 43 мың адам тексерілуі керек болса, нақтысында 45 мыңнан астам адам тексеруден өткен. Бұл – өте жақсы көрсеткіш. Сондай-ақ, заманауи GeneXpert атты әдіс арқылы туберкулезді тез әрі дәл анықтауға мүмкіндік бар. Бұл әдістің тиімділігі – 9,1 пайыз.
«БЦЖ екпесі – балаларды туберкулезден қорғаудың ең тиімді жолы. 2025 жылдың алғашқы жартысында балалардың 94,9 пайызы екпе алған. Қосымша егілген 30 баламен бірге жалпы қамтылу 96,5 пайызға жеткен. Сондай-ақ, туберкулезбен ауырған адамдармен байланыста болған балалардың 64 пайызына алдын алу емі берілген. Бұл былтыр тек 14,8 пайыз ғана болғанын ескерсек – үлкен жетістік»,-деп хабарлады жауапты медициналық мекеме.
Жарты жыл ішінде 242 медицина қызметкері, оның ішінде 54 дәрігер арнайы оқудан өткен. Сонымен қатар, облыста және шалғай аудандарда семинарлар мен түсіндіру жұмыстары жүргізілді. Туберкулезге қарсы күресте тек дәрігерлер емес, басқа ұйымдар да бірге жұмыс істеуде. Облыста «СТОП ТБ» серіктестігі жұмыс істейді. Бірнеше мекеме бірігіп, арнайы жоспар жасап, нақты жұмыстар атқаруда.
Солтүстік Қазақстан облысында туберкулезге қарсы атқарылып жатқан жұмыстар өз нәтижесін беруде. Ауру азайып, алдын алу шаралары күшейіп келеді. Дегенмен, балалар мен ересектердің толық қамтылуы, сондай-ақ аурудың алдын ерте алу жұмыстары әлі де жалғасуы керек.
Тағы оқыңыз: Полицейлердің арқасында зейнеткердің 2 млн теңгесі қалтасында қалды
