Солтүстік Қазақстан облысының табиғат қорғау прокуратурасы орман шаруашылығы саласындағы өрескел заң бұзушылықтарды анықтады. Тексеру барысында мемлекеттік орман қоры құрамына енгізілмеген және есепке алынбаған тоғыз мың гектардан астам орман алқабы белгілі болды, деп жазады Qazaqstan Media.
Орман кодексінің 51-1-бабына сәйкес, өзге санаттағы жерлердегі табиғи өскен орман екпелері міндетті түрде мемлекеттік орман қоры құрамына енгізілуі тиіс. Алайда облыстың табиғи ресурстар және табиғат пайдалануды реттеу басқармасының лауазымды тұлғалары бұл талапты орындамаған. Орман алқаптарын тиісті тәртіпте есепке алу және аудан әкімдіктерімен өзара үйлестіру жұмыстарын жүргізбеген.
Прокуратура талабы бойынша жүргізілген түгендеу нәтижесінде Айыртау, Есіл, Жамбыл, Қызылжар, Мамлют және Тимирязев аудандарында иесіз әрі қорғаусыз жатқан орман алқаптары анықталды.
Аталған заң бұзушылықтардың алдын алу және оларды жою мақсатында арнайы комиссия құрылды. Комиссия анықталған орман учаскелерін мемлекеттік орман қоры құрамына енгізу бойынша Жол картасын әзірлеп, нақты мерзімдер мен жауапты тұлғаларды белгіледі.
Комиссия жұмысының алғашқы нәтижесі ретінде Қызылжар орман шаруашылығы құрамына 46,2 гектар орман жері ресми түрде енгізілді. Қалған орман алқаптары бойынша жұмыс жалғасып жатыр.
Өз міндеттерін тиісінше орындамаған төрт лауазымды тұлға тәртіптік жауапкершілікке тартылды.
Тағы оқыңыз: Ғ.Мүсірепов ауданында роботтандырылған құрамажем зауыты жұмысын бастады
