СҚО бойынша ішкі мемлекеттік аудит департаменті «Ауылдық денсаулық сақтауды жаңғырту» ұлттық жобасын іске асыруға бөлінген бюджет қаржысының жұмсалуын тексерді. Аудиторлар 611 млн теңгенің қаржылық бұзушылығын анықтаған, деп жазады Qazaqstan Media тілшісі.
Солтүстік Қазақстан облысында «Ауылдық денсаулық сақтауды жаңғырту» ұлттық жобасын іске асыру үшін үкіметтен 6,6 млрд теңге бөлінген. Бұл қаржы өңірде 38 алғашқы медициналық-санитариялық көмек нысанын салуға бағытталды. Оның 16-сы фельдшерлік-акушерлік пункт болса, 22-сі медициналық пункт.
СҚО бойынша ішкі мемлекеттік аудит департаментінің мамандары бюджет қаржысының қалай жұмсалғандығын тексерген. Нәтижесінде 611 млн теңгеден астам соманың қаржылық бұзушылықтары анықталды.
«Олқылықтар 32 алғашқы медициналық-санитариялық көмек объектісін салу кезінде анықталған. Айталық, нысандарда медициналық жабдықтар, бейнебақылау және телефондандыру жүйелері, сондай-ақ жылыту жүйесіне қажетті жиынтықтар болмай шыққан. Бұдан бөлек, 21 құрылыс объектісінде 3,6 млн теңгені құрайтын рәсімдік сипаттағы бұзушылықтар анықталды. Яғни, олар шарттық міндеттемелерді уақтылы орындамаған құрылыс компанияларына тұрақсыздық айыбын толық көлемде ұсынбаған», — деп хабарлады Қазақстан Республикасы Қаржы министрлігінің ішкі мемлекеттік аудит комитеті.
Сондай-ақ төрт бірдей алғашқы медициналық-санитариялық көмек объектісі уақытылы тапсырылмаған. Мұны да тексеріс барысында аудиторлар анықтады.
«Қабылданған шаралар нәтижесінде 611,3 млн теңге қалпына келтірілді. Жұмыстар толығымен орындалып, тиісті жабдықтарды жеткізілген. Есептелген тұрақсыздық айыбының сомасы бюджетке толық көлемде қайтарылды. Жол берілген бұзушылықтар үшін басқарма басшысының міндетін атқарушы әкімшілік жауапкершілікке тартылып, 236 мың теңгеге жуық айыппұл төледі. Тағы бір лауазымды тұлға тәртіптік жауапкершілікке тартылды», — делінген жазбада.
Тағы оқыңыз: 376 солтүстікқазақстандыққа сот ішімдік ішуге тыйым салды
