Солтүстік Қазақстан облысы жолаушылар көлігі және автомобиль жолдары басқармасының QM рекдациясының арнайы сұрауына ресми берген жауабына сәйкес, 2025 жылы өңірде 1,2 мың шақырым жол жөнделеді. Оның 800 шақырымы жергілікті жолдардың еншісінде. Былтыр да шамамен осыншама жол дұрысталған.
Солтүстікте биыл Покровка-Петропавл, Кішкенекөл-Дәуіт, Меңкесер-Раздольное және Смирнова-Қиялы бағытындағы жолдар жөнделеді. Сонымен қатар, Горьковское –Восходское-Кішкенекөл-Қаратерек ауылдары арасындағы жолдар да жөнделеді. Жолдардың 80 пайызына орташа жөндеу жұмыстары жүргізілу жоспарланып отыр.
«2025 жылы шамамен 1,2 мың шақырым жол жөнделеді деп жобалап отырмыз. Оның 800 шақырымы жерглікті және көше жолдары. 467 шақырым республикалық маңызы бар жолдар. Биыл облыстық жолдарды жөндеуге 12,5 млрд теңге бөлініп отыр», — дейді СҚО жолаушылар көлігі және автомобиль жолдары басқармасы басшысының міндетін атқарушы Қанат Барқытов.
Жалпы, 1938 шақырым жол өңірлік маңызы бар деп есептеледі. Былтыр барлық маңыздағы жолдарды дұрыстауға 91,3 млрд теңге бюджеттен бөлініпті. Оған мың шақырымнан астам жол жөнделген. 208 км республикалық жолды ретке келтіру үшін 38,7 млрд теңге жұмсалған. 55 елді мекеннің 163 шақырымнан астамы жөндеу көріпті. Оның ішінде 64 км-ге жақыны облыс орталығындағы көшелерге тиесілі.
«55 елді мекендегі жолдарды жөндеу үшін 52,6 млрд теңге бөлініп, игерілді. Автомобиль жолдарын түрлі деңгейдегі жөндеу, жаңғырту жұмыстары бойынша жол компанияларына шағымданып, соттасу фактілері болған жоқ. Жұмыстардың барлығы нормативтік талаптарға сай қабылданады», — деді Қанат Барқытов.
Тағы оқыңыз: СҚО-да бюджет қаражатын пайдалануға қатысты шикілік шықты
