Солтүстік Қазақстан облысының Қызылжар ауданында ауыл шаруашылығы жануарларына арналған жоңышқадан жем шығаратын зауыттың құрылысы қарқынды жүріп жатыр. Жобаны «Salar Farm» ЖШС «Солтүстік» әлеуметтік-кәсіпкерлік корпорациясы» АҚ-ның қолдауымен жүзеге асыруда, деп жазады Qazaqstan Media.
Зауыт 2026 жылдың көктемінде іске қосылады деп жоспарлануда. Мұнда жоңышқаны өңдеудің толық циклі — жасанды кептіру, престеу және түйіршіктеу технологиялары енгізіледі.
Компания директоры Арман Уатаевтың айтуынша, жоңышқа — ақуызға бай, жоғары сапалы мал азығы.
«Біз бұл премиум жемді Қытай мен БАӘ нарықтарына экспорттауды көздеп отырмыз. Жоңышқаны өзіміздің суармалы алқаптарда өсіреміз», — деді ол.
Кәсіпорын жылына 60 мың тонна дайын өнім өндіретін болады. Барлық өндіріс процесі толық автоматтандырылады. Жобаның жалпы құны шамамен бес млрд теңгені құрайды.
Тағы оқыңыз: СҚО-да республикалық тас жолда болған жол апатында үш адам зардап шекті
