Солтүстік Қазақстан облысының Есіл ауданында 44 жастағы ауыл тұрғынының үйінен қару-жарақ арсеналы табылды. Ер адам үйінде тіркелмеген қару түрлері мен түрлі калибрлі патрондарды сақтап келген, деп жазады Qazaqstan Media.
«Мал ұрысы» және «Құқықтық тәртіп» жедел-профилактикалық іс-шаралары барысында полицейлер бір үйден бірнеше түрлі каруды тәркіледі. Есіл ауданының 44 жастағы тұрғыны «СКС» иір ұңғылы карабинін, аңшылық патронмен атуға болатын қолдан жасалған қару және «ИЖ-К» тегіс ұңғылы мылтықты заңсыз сақтап келген. Сонымен қатар, полицейлер ұсақ калибрлі винтовканың ұңғысы мен бекітпесін, тегіс ұңғылы мылтықтың ұңғысы мен 700 түрлі калибрлі патронды тәркіледі.
«Қарулардың бәрі тәркіленіп, олар бойынша сараптама тағайындалды. Полиция бұл факт бойынша қылмыстық іс қозғады. Ер адамға қатысты тергеу жұмыстары жүргізілуде. Оның қару-жарақтарды қалай алғанын және не мақсатпен пайдаланғанын тергеушілер анықтайтын болады», — деп хабарлады СҚО ПД баспасөз қызметі.
Заңсыз қару сақтау фактісі бойынша қылмыстық жауапкершілік қарастырылған: күдікті бес мың айлық есептік көрсеткішке дейін айыппұл төлеуі немесе бес жылға дейін бас бостандығынан айырылуы мүмкін.
Тағы оқыңыз: СҚО-да анасы мен үш баласы иіс тиіп ауруханаға түсті
