Солтүстік Қазақстанда ауыл әкімі жаңа жылдық безендіру жұмыстарын тиісті жүргізбегені үшін облыстық әдеп жөніндегі кеңеске шақырылды. Қызылжар ауданы Бескөл ауылдық округінің әкімі Гүлсім Кәрімова, аудан орталығын мерекелік безендіруге немқұрайлы қарап, жұмыстардың жөнді жүргізлімегеніне қарамастан қабылдау құжаттарына қол қойған, деп жазады Qazaqstan Media.
Қызылжар ауданының орталығы Бескөлдегі алаңды Жаңа жыл мерекесіне орай безендіру жұмыстарының құны 8,4 млн теңгеге бағаланыпты. Ол бойынша ауыл әкімі конкурста жеңіске жеткен қызылордалық кәсіпкермен 2024 жылдың 25-ші қарашасында келісімшарт жасасқан. Құжаттағы талап бойынша компания фигураларды жасап, жеткізіп, орнатуы қажет болған. Бірақ, жұмыстың жартысы орындалып, қалғаны қағаз жүзінде ғана қалған.
«Қызылжар ауданы прокурорлары Бескөл ауылдық округінің әкімі Гүлсім Кәрімоваға қатысты қызметтік тексеріс жүргізілді. Ол жеке кәсіпкермен алаңды жаңа жылдық безендіру бойынша 8 млн 435 мың 585 теңгеге келісімге отырған. Тексеру барысында алаңда мұздан жасалған бір ғана сырғанақ болған, мүйізтұмсық пен қоян фигуралары алаңда орнатылмаған. Осыған қарамастан ауыл әкімі 2024 жылдың 30-шы желтоқсанында жұмыстарды қабылдау құжаттарына қол қояды. Ал кәсіпкер тауарды кепілдік мерзімі өткеннен кейін жеткізген. Жұмысты қабылдау актісіне қол қойған кезде кәсіпкерге басымдық берілгені көрініп тұр», — деді іске қатысты баяндаманы оқыған СҚО бойынша мемлекеттік қызмет істері департаментінің бас маманы Әсемгүл Бегалина.
Бескөл ауылдық округінің әкімі қатесін жартылай мойындап отыр. Ол кәсіпкермен осыған дейін таныс болмағандығын айтты. Және де оған ешқандай басымдық бермедім, дейді.
«Бізде шынымен үш қардан жасалған фигура және мұз сырғанағы орнатылмады. Себебі, кәсіпкер үлгермеді. Біздің тарапымыздан мемлекеттік сатып алу порталына барлық хабарландырулар салынды. Кәсіпкер тұрақсыздық айбын төлеп, фигуралардың орнына жарықдиодты шамдарды орнату бойынша хатттама толтырды. Оны кәсіпкер жетінші қаңтарға дейн орнатуға уәде етті. Мен қаржылық жылды жабу үшін, жұмыстарды қабылдау актілеріне 30-шы желтоқсанда қол қойдым. Өз кінәмді жартылай ғана мойындаймын», — дейді Гүлсім Кәрімова.
Облыстық әдеп жөніндегі кеңес мүшелері мәселені жан-жақты қарастыра келе, ауыл әкіміне «қызметіне толық сай емес» деген ескерту жасауды ұсынды.
Тағы оқыңыз: СҚО-да екі айда 100-ге жуық адамды ит қапқан
