Солтүстік Қазақстан облысында жаздың бірінші айы ерекше ылғалды болды. Маусым айында орташа есеппен 49,2 миллиметр жауын-шашын түскен.Бұл шөптің қалың шығуына жақсы, деп хабарлайды Qazaqstan Media.
Жауын-шашынның көп түсуі топырақтың ылғалдылығын арттырып, шөптің қарқынды өсуіне зор септігін тигізді. Биыл облыста 392 мың гектар алқапқа мал азығы егілген. Бұл — былтырғы жылға қарағанда 37,9 мың гектарға артық.
Оның ішіндегі 109,5 мың гектары — біржылдық шөптер, 9,6 гектары — көпжылдық шөптер және 30 мың гектардан астамына жүгері отырғызылған.
Қыстың қамын, жазда ойлаған теріскейлік шаруалар маңызды науқанға мықтап кіріскен. Облыстағы мал басының саны 529 мыңды құрайды. Оның жартысынан астамы — серіктестіктерге тиесілі.
«Облыстағы төрт түлікті азықпен қамтамасыз ету үшін биыл 940 мың тонна шөп, 867 мың тоннадан астам сабан мен 818 мың тонна жем дайындау қажет. Сондай-ақ, 278 мың тонна пішендеме мен 237 мың тонна сүрлем әзірленбек»,-делінген облыстық ауыл шаруашылығы және жер қатынастары редакцияға берген мәліметінде.
Айта кету керек, теріскейлік шаруалар маңызды шаруаның 30 пайызын аяқтады.
Тағы оқыңыз: СҚО-да биыл 560-қа жуық азамат мас күйінде көлік тізгіндеген
