М.Жұмабаев ауданында көлік жүргізушісі жалған мемлекеттік нөмірмен жүргені үшін әкімшілік жауапкершілікке тартылды. Ол шекараны кесіп өтпек кезде анықталды.Бұл туралы аудандық сот хабарлады, деп жазады Qazaqstan Media.
М. Жұмабаев ауданы тұрғыны П. Есімді азаматта сынып тұрған көлігі болған. Ол Ресейде тіркеуде тұрған дәл сондай маркалы басқа көлікті сатып алған. Алайда, бұл көлікті Қазақстанда заңды түрде тіркемей, оған өзінде бұрын болған қазақстандық нөмірді тағып алған.
Жалған нөмірмен жүргенін шекара бекетінде шекарашылар анықтап, құқық қорғау органдарына хабарлаған.
Сотта П. кінәсін мойындап, заң бұзғанын түсінетінін айтты. Дегенмен, бұл әрекеті үшін ол жауапкершіліктен босатылған жоқ. Сот оны ҚР Әкімшілік құқық бұзушылық туралы кодексінің 590-бабы 4-бөлігі бойынша кінәлі деп танып, үш тәулікке әкімшілік қамауға алу және бір жыл мерзімге көлік жүргізу құқығынан айыру жазасын тағайындады.
Сот қаулысы заңды күшіне енді.
Тағы оқыңыз: Әлемдегі ең әйгілі футбол клубтарының бірі «Реал Мадрид» Қазақстанға келеді
