IV Ұлттық құрылтайда айтылған бастамалар бойынша Петропавлда дөңгелек үстел өтті. Оған петропавлдық жастар, қоғам белсенділері қатысты, деп жазады Qazaqstan Media тілшісі.
Көкшетауда өткен құрылтайға біздің өңірден облыстық қоғамдық кеңес пен Ұлттық құрылтай мүшесі Сергей Худяков қатысқан. Оның пікірінше, жиын биік деңгейде өткен. Президент елдегі барлық саланы қамтып, өзгерістер жайында айтып, болашаққа бағдар болатын бағыттарды айқындаған. Мәселен, инфрақұрылымды дамытуға қыруар қаражат бөлініп отыр. Бұл орайда біздің өңірде де алдағы үш-төрт жылда өзгерістер болады.
«Құрылтайда көтерілген мәселелер ауқымды. Ол — бала тәрбиесі, оқу, тіл мәртебесі, геосаяси ахуалды жақсарту және де инфроқұрылымды дамыту. Оның ішінде жолдарды жөндеу, теміржол саласы және ЖЭО құрылысы сынды бағыттарға басымдық берілді. Солтүстік Қазақстан облысының инфроқұрылымын жақсартуға ұлттық жоба аясында алдағы үш жылда 600 млрд теңге бөлінбек. Бұл өте қомақты қаражат. Оның барлығы толық игерілуі керек. Қайтару да қажет етеді. Оның бір бөлігі тарифтерді қымбаттату арқылы қайтарылса, жартысы табиғи монополия субъектілерінің қарыз қаражаты арқылы қайтарылады», — деді Сергей Худяков.
Жиынға қатысушылардың басым бөлігі жастар болғандықтан, тәрбие мен білім туралы да көп айтылды. Бұл мәселені құрылтайда Қасым-Жомарт Тоқаев та айтқан болатын.
Ашығын айтсақ, бала оқыту ісінде бұған дейін білімге көбірек назар аударылды. Ал ұрпақ тәрбиесіне қатысты жүйелі ұстаным болған жоқ. Бұл салаға тиісті деңгейде көңіл бөлінбей келді.
«Тәрбиесіз берілген білім – адамзаттың қас жауы». Сондықтан біліммен қатар тәрбиеге айрықша назар аудару өте маңызды. Былтыр мектептерде «Біртұтас тәрбие» бағдарламасы қолға алынды. Бағдарламаны қабылдау – істің басы ғана. Енді жаңарған құжатты еліміздегі барлық мемлекеттік білім ошағына енгізу керек. Оны алдағы уақытта жекеменшік мектептер де басшылыққа алуға тиіс. Себебі, тәрбие жұмысы балаларды түгел қамтуы қажет. Сонда ғана бұл бастама жалпыұлттық ауқымға ие болады. Жобаның түпкі мақсаты – отаншыл, білімді, жасампаз ұрпақ тәрбиелеу. Мұның бәрі – адал азаматқа тән қасиеттер», — деген еді президент.
Тағы оқыңыз: Петропавлда 21 жастағы жігіттің мәйіті табылды
