Ұлы Жеңістің 80 жылдығын тойлауға арналған жоспар ауқымды. Петропавлда ондаған түрлі тақырыптық іс-шаралар өтеді. Оның ішінде ән байқауы,сенбіліктер және де мерекелік отшашу бар, деп хабарлайды Qazaqstan Media тілшісі.
Ұлы Отан соғысындағы жеңісті мерекелеу үшін кешенді жоспар құрылған. Оның аясында сурет, кітап көрмесі, мектептерде сынып сағаттары, тақырыптық акциялар ұйымдастырылады. Ал ең ауқымды деген іс-шаралардың қатарына «Мамыр жұлдыздары» әскери-патриоттық ән быйқауын жатқызуға болады. Сонымен қатар, жауынгерлер жерленген орындар мен ескерткіш маңында «Еске алу бағыты» атты сенбіліктер ұйымдастырылады.
«9 мамыр дәстүрлі түрде Ұлы Отан соғысына қатысқан жерлестерге арналған ескерткіштер мен монументтерге гүл шоқтарын қою рәсімі өтеді. Қазіргі кезде тарихи нысандар жаңартылып жатыр. Петропавл бойынша, 8 мамырда Даңқ монументі мен 314 атқыштар дивизиясы ескерткішіне гүл шоқтары қойылады. Ал Жеңіс күні «Мәңгілік алау» және Жеңіс стелласына гүл шоқтарын қою жоспарланып отыр», — дейді қалалық ішкі саясат бөлімінің басшысы Диана Попова.
Сонымен қатар, 9 мамырда орталық алаң мен Жеңіс саябағында мерекелік концерттер өткізіледі. Ал сол күні кешкісін ретро-би кеші ұйымдастырылып, мерекелік отшашу болады.
Мерекені тойлау аясында қайырымдылық акциялары да өткізіледі. Ардагерлер мен тыл еңбеккерлеріне көмек көрсетіліп, азық-түлік, дәрі-дәрмек және бірінші қажеттегі тұрмыстық заттар үлестіріледі.
«Қазақстандық «Жеңіс лентасын» танымал етуге ерекше көңіл бөлініп отыр. Мамыр айынан бастап ірі сауда үйлері мен жанар-жағармай құю бекеттерінде лентаны тарату бойынша акциялар бастау алады. Оны үлестіру барысында лентаның мән-мағынасы, маңыздылығы туралы толық ақпарат берілетін болады. Сонымен қатар, жеңіс жауынгерлерінің ерлігі туралы да айтылады», — деді Диана Попова.
Қазақстанда барлығы 120 соғыс ардагері тұрады. Ал Солтүстік Қазақстан облысында үш ардагер бар. Ол — Валентина Волкодав, Василий Макиенко және Федор Щеглов. Олардың барлығы Петропавлда тұрады. Қарт майдангерлердің әрқайсысы Жеңіс күніне бес млн теңгеден алады.
Ардагерлерден басқа, аймақта концлагерьлердің, геттолардың және басқа да мәжбүрлі ұстау орындарының тұтқындары тұрады. Олар жүз мың теңгеден алады. Ардагерлердің жесірлері мен тыл еңбеккерлеріне 50 мың теңгеден беріледі.
Солтүстік Қазақстан облысында төлем алуы тиіс барлығы 1 500 адам бар. Ал бүкіл елде жеңіске үлес қосқан 42 мыңнан астам адам тұрады.
Тағы оқыңыз: Петропавлда «Ер есімі-ел есінде» акциясы онлайн өтеді
