Петропавлда жаңа оқу жылында су жаңа мектеп ашылды

Бүгін «Береке» ықшам ауданында ақ түйенің қарны жарылған күн. Елді мекенде су жаңа мектеп ашылды, деп хабарлайды Qazaqstan Media.

Жаңа оқу жылы — су жаңа мектеп. «Береке» ықшам ауданында су жаңа мектеп қолданысқа берілді. Білім ұясы бір ауысымда 600 орынға шақталған. Бүгінде 700-ден астам оқушы қабылданыпты.

Салтанатты шараға облыс әкімі Ғауез Нұрмұхамбетов қатысты. Өңір жетекшісі балаларды білім күнімен құттықтады. Жергілікті әкімдіктен балаларға әрдайым зор қолдау көрсетілетінін жеткізді.

«Мына тұрған балақайлардың барлығы — елдің болашағы. Жеткіншектер заманауи, іші кең, бар жағдай жасалған білім ұясында оқуы тиіс. Осының арқасында елімізде қарыштап дамиды. Сондықтан жергілікті әкімдік пен ұстаздар бірігіп жарқын болашаққа жол ашайық»,- деді СҚО әкімі.

Қыздардың басында ақ бантик, ұлдар мойындарына галстук байлаған. Үстерінде – дәстүрлі жаңа мектеп формасы. Бәрінің мақсаты – озат оқушы атану.

«Мен мектепке дайынмын. Жаз бойы дайындалдым. Кітап оқыдым. Бүгін сыныптастарыммен танысып, дос болдым. Сабағымды жақсы оқитын боламын»,- деді №29 жалпы білім беретін мектептің бірінші сынып оқушысы Айым Темірхан.

Заманауи нысанның іші кез келген жанды таңдай қақтырады. Жарық, кең әрі еңселі сыныптар, соңғы үлгідегі құрал-жабдық пен жиһаз. Облыс әкімі білім ұясын толық аралап шықты. Әр аялдаған жерінде өзінің оң бағасын берді. Ұстаздарға сәттілік тіледі.

Мектеп базасы балаларға қажетті барлық құралмен жабдықталған. Нысанда 30-дан астам оқыту бөлмесі, екі спорт зал, компьютер кабинеттері, мәжіліс залы мен кітапхана және асхана бар.

«Жоба құны — 4,9 млрд теңге. Білім ұясы “Келешек мектептері» ұлттық жобасы аясында жүзеге асты. Мектеп 80-нен астам мұғалім жұмыс істейді. Әрбіреуі іріктеуімізден өткен білікті мамандар»,- деді №29 жалпы білім беретін мектептің директоры Сәуле Тұрсынова.

Бұл Петропавлдағы «Келешек мектептері» жобасы аясында ашылған екінші білім ұясы.

Тағы оқыңыз: Петропавлда ұлттық киімдер дүкені ашылды