Қазіргі кезде Петропавлдағы Ойқала ауданында су сору жұмыстары жалғасып жатыр. Төтенше жағдайлар департаментінің мамандары мотопомпалардың көмегімен аталмыш ауданнан жарты күн ішінде 2500 текше метр суды сорып үлгерді, деп жазады Qazaqstan Media тілшісі.
Ойқалада қазір судың беті қайтып келеді. Қазіргі күні аулалар мен ойпаң жерлердегі су сору жұмыстары жүргізілуде. Бүгін төтенше жағдайлар департаментінің мамандары бес мотопомпаның көмегімен Потнанин және Павлов көшелерінен суды Есіл өзеніне қарай ағызуда.
«Бір мотопомпа сағатына 130 текше метр суды өткізе алады. Біз осыны ескере отырып, орташа есепті шығардық. Таңғы сағат тоғыздан бастап шамамен 2500 текше метр су сорылды. Үйлерінен су кеткен тұрғындар баспаналарына бағалау комиссиясымен келіп жатыр. Техникалық тексерістен кейін рұқсат берілсе үйлеріне орала алады. Зардап шеккен азаматтардың кейбірі есіктерін ашып беруге көмек сұрап келді. Себебі, суда тұрғасын ағаш есіктер ісініп кеткен. Біз тұрғындарға барынша көмектесіп жатырмыз», — дейді Петропавл қалалық №1 мамандандырылған өрт сөндіру бөлімінің аға инженері Руслан Ибраев.
Ойқала ауданында су сору және аумақты қоқыстан тазарту жұмыстарына тұрғындардың өздері де ат салысуда. Олар осылайша, төтенше жағдайлар департаментінің қызметкерлеріне көмектесіп жатыр.
Тағы оқыңыз: «Қызылжар су» ЖШС сорғы станциясын қалпына келтіру жұмыстары басталды
