Петропавлдың мәдени өмірінде бүгін маңызды оқиға орын алды. Облыстық тарихи-өлкетану музейінің бұрынғы директоры Константин Ушковқа арналған мемориалдық тақта ашылды. Ол ҰОС ардагері және Қазақ КСР еңбек сіңірген мәдениет қайраткері, деп жазады Qazaqstan Media тілшісі.
Констанин Ушков облыстың мәдени өміріне, тарихи-өлкетану мұражайының қалыптасуына үлкен еңбек сіңірді. Ол аталмыш мекемені 1947-1983 жылдары басқарды. Осы уақыт аралығында облыстық музей еліміздегі үздік тарихи нысандардың қатарына енген. Кітапхана қорын құрып, жаңа экспонаттарды жинады. Тіпті, бейнелеу өнері мұражайын ашуға мұрындық болды. Ол 1951 жылы музей қабырғасында көрмелер ұйымдастырды. Алдымен ғимараттан бейнелеу туындылары үшін зал бөлінді, кейін басқа мекеме ретінде құрылды.
«1968 жылы музей жаңа ғимаратқа көшірілді. Сол кезде біз осы ғимаратқа жәдігерлерді қолмен тасыған едік. Констанин Сергеевич тарихқа, мәдениетке, әдемілікке жақын жан еді. Әрдайым ізенімпаз болатын. Бізге жұмыс істеуге кедергі келтірген емес. Күні-түні мұражайдың жағдайын ойлаумен болатын», — дейді СҚУ профессоры Анатолий Плешаков.
Константин Ушаков 1973 жылы жаңа музей кешенін құрғаны үшін «Құрмет Белгісі» орденімен марапатталған. Ол өз ісінің маманы әрі ардақты әке бола білген. Оның қамқорлығы, әкелік махаббаты туралы жалғыз қызы Ирина Данилова айтты.
«Әкем мейірімді жан еді. Жұмысына да, отбасына да уақыт табатын. Сабырлы еді. Әр сәтті есте сақтау керек деп отыратын. Ол көз жұмғасын құжаттарды ақтара отырып, өзімнің бала кезде салған суреттерімді таптым. Ол ешкімге айтпай сақтап жүріпті. Ол мен үшін асыл адам болып қала береді», — деп естелігімен бөлісті Ирина Данилова.
Константин Ушковқа арналған мемориалдық тақта облыстық тарихи-өлкетану мұражайы қабырғасында орнатылған. Ол аталмыш мекеменің 100 жылдығына орай ашылды.
Тағы оқыңыз: СҚО-да «Еңбек» бағдарламасымен салынған алты үй өртенді
