Петропавлда білім мен спорт саласына ерекше көңіл бөлінуде. Биыл шаһарда бір зәулім мектеп қолданысқа берілді. Жыл соңына дейін балабақша ашылатын болады. Бірнеше спорт нысандары да бой көтереді, деп хабарлайды Qazaqstan Media.
Петропавлдағы «Жас өркен» ықшам ауданындағы балабақша жыл соңында қолданысқа беріледі. Маңызды іспен жергілікті «Основание» серіктестігі айналысуда. Жоба «Қазақстан халқына» қорының қолдауының арқасында жүзеге асып жатыр. Нысан қолданысқа берілгеннен кейін Петропавлда балабақша кезегі атымен жойылады.
«Ағымдағы жылы Петропавлда су жаңа мұз айдыны қолданысқа беріледі. Ғимараттың ішінде жүзу бассейні мен ойын алаңы бар. Заманауи нысан шаһардағы тұрғындардың салауатты өмір салтын ұстануға, сонымен қатар, спорт саласының дамуына ықпал етеді», — деді Петропавл қаласының әкімі Серік Мұхамедиев.
Петропавлда «Келешек мектептері» жобасы қарқынды жүзеге асып жатыр. Бірінші қыркүйек күні «Береке» ықшам ауданында су жаңа білім ұясы ашылды. Нысан 600 орынға шақталған. Өткен жылы дәл осындай оқу орны «Орман» шағын ауданында да қолданысқа берілген болатын.
«Алдағы уақытта Петропавлда әмбебап спорт нысанын, конькимен жүгіру орталығын және футбол академиясын салуды жоспарлап отырмыз. Сонымен қатар, қазіргі таңда триатлон паркінің жобалық-сметалық құжаттамасы дайындалуда. Нысан Пестрое көлігің маңында бой көтереді», — деді Серік Мұхамедиев.
Тағы оқыңыз: Қала әкімі: «Біздің мақсат – жайлы қала қалыптастыру»
