Петропавлда телефон алаяқтықтарын ұйымдастырған ірі қылмыстық желі тоқтатылды. Жедел әрекеттер нәтижесінде шетелдік азамат ұсталды. Ол заңсыз қоңырауларды бағыттау жүйесін ұйымдастырған. Қылмыскерді ұстауға Ішкі істер министрлігі киберқылмысқа қарсы іс-қимыл бөлінісінің қызметкерлеріне Tele2 ұялы байланыс операторы көмектескен, деп жазады Qazaqstan Media.
ІІМ киберқылмысқа қарсы іс-қимыл департаментінің бастығы Жандос Сүйінбайдың айтуынша, қылмыскерлер sim-box құрылғыларын пайдаланып, нөмірлерді ауыстырып, қоңырауларды жасырын жасап келген. Бұл тәсіл оларға қауіпсіздік жүйелерін айналып өтуге, алаяқтық қоңырауларды жасыруға және азаматтарға, банктер мен мемлекеттік құрылымдарға шабуыл жасауға мүмкіндік берген.
«Тінту барысында үш пәтердің әрқайсысында 32 sim-картадан орнатылған төрт sim-box құрылғысы, төрт маршрутизатор, төрт Wi-Fi роутер, ноутбук, екі ұялы телефон және флэш-карта табылып, тәркіленді», — деді ІІМ киберқылмысқа қарсы іс-қимыл департаментінің бастығы Жандос Сүйінбай.
Жыл басынан бері киберполицейлер байланыс операторларымен бірлесіп, 68 sim-box құрылғысын, қылмыстық схемаларда пайдаланылған 88 мыңнан астам sim-картаны тәркіледі. 29 адам ұсталса, оның 13-і шетелдік азамат. Қолданыстағы заңнамаға сәйкес, заңсыз желіні ұйымдастырған және интернет-алаяқтарға көмектескен тұлғалар 10 жылға дейін бас бостандығынан айыру жазасына тартылуы мүмкін.
ІІМ азаматтарды жеке деректерді бөгде адамдарға бермеуге, күдікті қоңыраулар немесе хабарламалар түскен жағдайда құқық қорғау органдарына дереу хабарласуға шақырады.
Тағы оқыңыз: Петропавл әкімдігі кәсіпкерге 29 млн теңге қарыз болып қалған
