Петропавлда дәстүрлі күзгі ауыл шаруашылығы жәрмеңкесі қызу өтті. Мұнда жергілікті фермерлердің өніміне сұраныс жоғары. Уәлиханов ауданынан келген ауыл шаруашылығы тауар өндірушілері нарық бағасынан төмен бағада түрлі өнімдерді ұсынды. Олар ет, сүт өнімдері, көкөністер мен жем-азық алып келді, деп хабарлайды Qazaqstan Media.
Уәлиханов ауданының шаруалары мен аграрийлері жыл сайын облыстық жәрмеңкеге белсене қатысып, қала тұрғындарының сеніміне ие болған. 11 ауылдық округтің барлығы жәрмеңкеге өз өнімдерін жеткізді. Сөрелерде жаңа сойылған ет, қымыз, сүт өнімдері мен іріктелген көкөністер сатылды.
Көктерек ауылынан келген Қанат Жексенбаев шамамен он жыл бойы мал шаруашылығымен айналысады. Ол жәрмеңкеге өз қожалығының қой мен сиыр етін алып келген. Үй жануарларын отбасымен бірге бағып-күтіп, етті сою және өңдеу жұмыстарын да туыстарымен бірге атқарады.
Қанаттың сөресінің маңында таңнан бері адамдар көп. Сатып алушылар етті қызығушылықпен алып жатыр, өнімнің көбі таңғы уақытта-ақ өтіп кеткен.
«Бес қой мен үш сиырдың еті сатылып кетті. Адамдар риза, жақсы алып жатыр. Бізде баға қолжетімді — еттің килограмы 2900 теңге. Жәрмеңке өте жақсы өтуде, бәрі көңілден шығады», — деді Қанат Жексенбаев.
Уәлиханов ауданының өнімдерін алуға тұрғындар отбасымен келеді. Анатолий Ульянцев ата-анасы мен жұбайын ертіп, мол сатып алуға келген. Ол жәрмеңкеге арнайы үй етін және май алу үшін келген. Қанаттан бес келі қой етін сатып алып, сәтті саудасына қуанышын жасырмады.
«Жақсы ет алу үшін ерте келу керек екенін білемін, сондықтан таңертең ерте келдім. Уәлиханов ауданынан келген өнім әрқашан сапалы. Ол жақта достарым мен туыстарым бар, жиі барып тұрамын. Әрине, қымызды да алғым келді. Сатып алғаныма өте ризамын, бәрі дәмді әрі табиғи екеніне сенімдімін», — деді Анатолий.
Уәлиханов ауданының ауыл шаруашылығы бөлімінің басшысы Жолдыбай Хасеновтің айтуынша, жәрмеңкеге жалпы 10 сиыр еті, 4 жылқы және 17 қой еті әкелінген. Сонымен қатар сатып алушыларға картоп, шөп, астық қалдықтары мен жарты тонна табиғи қымыз ұсынылды.
Өнімдердің төмен бағасы сатып алушыларды көптеп тартты. Бағалар дәстүрлі түрде нарықтағыдан 10–15 пайызға төмен болды. Жәрмеңке жергілікті шаруашылық өнімдеріне деген тұрақты сұранысты айқындады.
Тағы оқыңыз: Петропавлда өткен ауыл шаруашылығы жәрмеңкесінде Жамбыл ауданының өнімдері жоғары бағаланды
