Былтыр су тасқыны кезінде эвакуациялық пункттерді тамақпен қамтамасыз еткен кәсіпкерге Петропавл әкімдігі 29 млн теңге қарыз болып қалған. Бұл туралы облыстық прокуратурада өткен кеңесте белгілі болды, деп жазады Qazaqstan Media тілшісі.
Бір жылға жуық уақыттан бері қарызын қайтара алмай жүрген бизнесмен облыстық прокуратураға жүгінген. Оның қолында барлық міндеттемелер мен жұмыстарды орындағаны жөнінде қол қойылған актілер де бар. Соған қарамастан кәсіпкерге әлі күнге дейін ақша төленбеген. Өйткені, жасалған шарт қазынашылық органдарында тіркелмеген екен.
«2024 жылы төтенше жағдай режимі кезінде Петропавл қаласы әкімінің аппараты эвакуациялық пункттердегі су тасқынынан зардап шеккен тұрғындарды тамақпен қамтамасыз ету үшін кәсіпкермен келісімшарт жасасқан. Бизнесмен шарттың талаптарын орындады, ол туралы актілерге қол қойылды. Яғни, тапсырыс беруші жұмысты қабылдады. Алайда, шартта көрсетілген мерзімде төлем жасалмады. 29 млн теңге қарызын қайтара алмай жүрген кәсіпкер сотқа жүгінуге мәжбүр болды», — дейді СҚО кәсіпкерлер палатасының бөлім бастығы Айдос Кеңбейілов.
Бір қызығы былтырғы су тасқыны кезінде мұндай жағдайлар көп кездескен. Орындалған жұмыстардың дәлелдеріне қарамастан, сот кәсіпкерге талапты қанағаттандырудан бас тартты.
«Сотта әкім аппаратының келісімшартты қазынашылық органдарында тіркемегені анықталды, бұл заңнамаға сәйкес оны жарамсыз етеді. Сонда мемлекеттік органдар тіркелмеген шарт туралы біле тұра кәсіпкерден жұмысты қалай қабылдап, талап етті деген заңды сауал туындайды. Бұл оқиға жекелеген мемлекеттік органдардың жосықсыздығын көрсетеді», — деп жалғастырды Айдос Кеңбейілов.
Осындай оқиғалардың жиілеуіне байланысты облыстық кәсіпкерлер палатасының заңгерлері бизнесмендерге келісімшарттың қазынашылық органдарында тіркелуін алдын ала куәландыруды ұсынды. Әсіресе, шарт сомасы 100 АЕК-тен асатын кәсіпкерлер мұны ескергені абзал. Бұл келісімшарттың жарамсыздығына байланысты төлем жасаудан бас тарту сияқты жағымсыз жағдайларды болдырмауға көмектеседі. Облыс прокуратурасы бұл жағдайды тағы бір қарастырып көруге уәде берді.
Тағы оқыңыз: СҚО-да биыл бір мың шақырымнан артық жол жөнделеді
