Солтүстікқазақстандық 14 түлек Kozybayev University-нің грантына ие болды. Оларды мектеп бітірушілерге ЖОО-ның қызметкерлері табыстады, деп хабарлайды Qazaqstan Media.
Бүгін өңір мектептерінде соңғы қоңырау мерекесі өтті. Үлкен өмірге қадам басқан қыз-жігіттерді бұл күні М. Қозыбаев атындағы СҚУ қызметкерлері де құттықтап, 14 түлекке білім грантын табыс етті. Тегін оқу мүмкіндігіне ие болғандардың бірі – Арыстанбаба Ешманов. Ол дарынды балаларға арналған ЛОРД мектеп-лицей-интернатының түлегі. Бұл грант оған АҚШ-тың Аризона университетінде оқуға мүмкіндік береді.
«Kozybayev University-нің грантын жеңіп алғаныма өте қуаныштымын. Бұл мен үшін үлкен мүмкіндік. Аризона университетінде оқу – менің армандарымның бірі еді. Арманымның орындалғанына қуаныштымын. Алдағы уақытта еліміздің дамуына өз үлесімді қосқым келеді», — деді Арыстанбаба.
Мұндай гранттар облыстың дарынды оқушыларына табысталды. Грант иегерлері арасында ЛОРД мектеп-лицейінен бөлек, тағы Әлихан Бөкейхан атындағы №25 орта мектеп, Тайынша ауданындағы Чкалов орта мектебі, БЭСТ гимназиясы, Қызылжар ауданының Озерное орта мектебі, Әбу Досмұхамбетов атындағы облыстық мамандандырылған гимназия, Бескөл мектеп-колледжі және Шал ақын ауданы Кеңес орта мектебінің түлектері де бар.
Айта кету керек, Аризона университетімен бірлескен қос дипломдық бағдарламалар аясында 400 грант бөлініп отыр. Оның 200-і IT технологиялар, биотехнология және инклюзивті білім беру бағыттарына арналды. Бұл – жас түлектерге шетелде, атап айтқанда АҚШ-та, сапалы білім алуға мүмкіндік береді.
Бағдарламаға қатысушылар Kozybayev University мен Аризона университетінің дипломдарын қатар алады. Оқу ағылшын тілінде жүргізіледі.
Тағы көріңіз: СҚО-да аудандық ТҮКШ бөлімі 1,8 қазандық сатып алған
